Ka North Liberty Higher Secondary School Jowai, ynne ka sngi da sdang ko yei lehkmen dap 25 snem i lai luti wow chakri lyngba i stat i tip wei ha kani ka jooh ka sngi da pynkup burom haroh ki ya ki khynnah skur wa dang dep Pass ha ka Result SSLC wa HSSLC ka MBOSE da ka yalang wa tip kam ka 14th Felicitation Ceremony 2025.
Da wan sakhilang ha kani ka sngi da u Symbood Montri Rangbah ka sorkar jylla, u Sniawbhalang Dhar kam u kongsan, u Wailadmiki Shylla, MLA ka Jowai Constituency kam u symbood kongsan, hei emlang ka DSEO, ka A.P.Syiem, u Dolloi ka Elaka Jowai, u Puramon Kynjing, ki bei ki pa yong ki khynnah, kiwa chah khut sñiawbha wa kiwi.
U Principal yong kani ka skur, u Richard Uriah hawa khana yei lai luti ka skur nadooh u snem 2000 hadooh katni, pynsñiaw u i kmen neibhah wot hawa hap maad u ya chiboon i eh hei lai luti leh, tangwa dei yoh kyrchaan won na kiwa boon wa lang kamjooh ki bei ki pa yong ki khynnah skur, kani ka skur da nangku nangroi ko na ki snem cha ki snem.
Khana haroh u wa ha u snem 2012 kani ka skur da sdang ko u yoh Ranking ha ka Result SSLC ka MBOSE deiwa yoh yei kyrdan wa 16, wei nadooh utai u snem hadooh kani ka khyllipmat da pteiñ yeini wei waroh da em ki 16 ngut kiwa da mih pyrtuid deiwa yoh kyrdan waphær waphær.
U Wailadmiki Shylla hawa yaroh yei lai luti kani ka skur ong u i yoh Rank wa 7 snem lynter kani ka skur ymtoh iwa ke, najrong wym du wa bna naam ko hei puræ puthi, tangwa hei yalehke Sports wa kiwi de.
Yooluti haroh u wa hapoh i yahkhmat u Principal kani ka skur, u nang ku wei rah burom ko ya ka District wei yow man kam ka nongmuna leh ya kiwi.
Da pynrap u leh wa em won ki skur ki wym jooh pynemkaam bha yeiwa yoh, tangwa pait ki du yei duna.
U Sniawbhalang Dhar hawa e yei klam da ong u kani ka skur toh kawa pynsñiaw sarong ya ki kam kiwa mihkhmat lyngba ki Result wa bha. Wei yaroh u leh ya u Principal ka skur yei stat wei chemphang yong oo wow pynku yei stat i tip.
Ong u i stat i tip toh kawa kongsan tam ha ka juk katni, neibhah wow kreh næ leh ya iwon iwon i kaam khlem i stat i tip wanrah ko chiboon i eh deiwa e nongmuna ya kattu katni i jia wa sakhiat ha ka jylla wa ka ri.
Neibynta kiwa da chah pynkup burom ha kani ka sngi, ong u kani dang toh i sdang, emkaam u minot chakhmat yow yoh man kiwa yahkhmat wa khroo ha ka jylla.
Katwa neibynta kiwa rap duna hei puræ puthi won kyntu u wym toh u dooh kyrmen, neibhah ym du kiwa yoh chakhamt wa ye u tyrchaaiñ hei im tangwa ha jar jiar i bynta ki leh man hi kiwa stat wei ye ki u tyrchaaiñ.
Da ong u leh wa kam ki bei ki pa leh ymtoh u sarom ki lym yoh ki khon u lai skur cha sor næ ha ki thaw wa syad, tangwa toh u kynmoo wa ki jooh hi ki kot ya puræ ki.
Da yoh leh i klam ha kani ka sngi na kawa yoh 1st Position yong ka HSSLC Result MBOSE ha ka Science Stream, ka Avila Kathrene Lyngdoh, neitæ i chaad i rwai na ki khynnah skur wa kiwi ki jait pynwyrngia.
Discussion about this post