Ka Meghalaya Pradesh Congress Committee (MPCC) da pynkhreh ko wow sai da ka thup yong ki kaam pyrchah aiñ (Charge Sheet) wa leh da ka sorkar Meghalaya Democratic Alliance (MDA) ya kiwa daw saam leh cha ki paidbah.
U President ka MPCC, u Vincent H Pala da ong u wa kamwa man katni waroh pyrchah ki ya ka aiñ yakhle, tangwa ka sorkar MDA da lai ko chaphrang wow pynkrehkaam ya ka.
Da kdaw u leh hajrong ki kaam baamtooh deiwa booh ya ki thaw khrong dan pyrchah aiñ ha ki sarokbah wa pynlai da ka sorkar wa ki District Council, kiwa da ktah chiboon ya ki paidbah.
Chooh chooh da ong u wa heiyatoh wa i yoh i laa ka jylla, kani ka sorkar wa katni ymye ko wow su tulop ya kiwa sikai, kiwa kreh ha i chait i khiah, wei ini wan jia i toh wa ka sorkar ym yoh dan ko neidaw wa joor i baamtooh, wei heithaw wa ka sorkar u yoh poisa ko na ki dan da lai pathan ko cha ka kata ki bru samen.
