U MLA ka NPP na Raliang, u Comingone Ymbon ynne ka sngi hawa yaklam wa kiwa pathai khubor da ong u wa neiliang yong oo dang sñiawskem u wow jop ha ka MLA 2023 neibhah katkam i yoo yong oo, ki paidbah dang em ki i chaniah ya oo wow yahkhmat ya ka Constituency.
Heiyatoh wa ki kaam kiwa dang sahteiñ wei kiwa angnood wow leh, u Comingone da ong u wa hapoh ka Constituency dang em chiboon iwa emkaam heiyatoh wa i roi i paar khamtam ki luti syngkieñ, ki skur, ki thaw sumaar wa kiwi kiwi.
“Heipor yong nga da chimkhia bha O wow thoohlaad kammon wow seiñ ya ka Shangpung College, wei katni da tipmit ya ka kam ka Peoples College da ka sorkar,” da ong u Comingone.
Heijooh i por da ong u wa hapoh ka thaaiñ Laskeiñ Block ym em wot tang kawi leh ka College, wei i wanrah ya ka daw ye ko u chakri ya ki khynnah ka thaaiñ wei boonsien ki College em ki du ha sor iwa wanrah yei khynñia weiwa ki kaam pynroi ka sorkar hi rap mylliñ ko ya ki thaw palat-sor.
