Shillong: U Montri ka chnat kaam pynroi sor, u Hamlet Dohling da ong u wa ka sorkar mynstep ka sngi daw khut yalang ko wow yaklam hajrong i khooid i jngiar ka thaaiñ Police Bazar wa ka sor Shillong waroh kawi wei yeini da ong u hawa yaklam wa kiwa pathai khubor ynne ka sngi hadien wa lai pait ha ka thaaiñ Police Bazar.
Ha kani ka yalang daw em ki sahep na ki chnat krehkaam waphær waphær ka sorkar jylla.
Yeini i lai pait ya ka Police Bazar ynne ka sngi toh hadien wa ood ki paidbah wa lai wa wan na kylleiñ ka sor Shillong wa kiwa na baar yei wym khooid wei khynnia kani ka thaw.
“Da wan pait i ya kani ka thaw wei da chem i yei wym khooid ka sarok ki luti syngkieñ,” da ong u Hamletson.
Da ong u leh wa ka Police Bazar da rap khooid ko hawa wyrchaw wa ki por wa dadep wei neiliang yong oo kwah u wa i khooid u neh i wow pynsñiawsuk ya kiwa lai wa wan kamjooh leh yei chait i khiah.
“I pynkreh neibynta ka ‘Smart City’ leh da lai ko chakhmat wei i khooid i jngiar leh man ko chibynta yong ini,” da ong u.
Ha iwi i liang da sñiawkhia u yei leh khlemakor kiwa lai wa wan namo kiwa chongdai kiwa brait pyntaroi ya ki song baam, ki snieh soh, plastic wa kiwi kiwi ha kani ka thaw.
Hajrong i khynnia ki sarok nei tia ware kiwa chongdai chakhmat dukan da ong u wa ini man i i wym yahaap iwa da wanrah yei khynnia ki sarok ka Police Bazar deiwa pynrap leh ympu ye u ong katwa em neibhah dang em ka mutkotduma hapyrdi kiwa dai madan wa ka sorkar jylla ha High Court.
Heiyatoh won wei thaw neibynta kiwa chong dai madan, da pyntip u wa dang thooh thaw neibynta yong ki wow ye ki u dai ya ki mar yong ki.
“Ympu ye u ong katwon tylli, tangwa da em kattu katni ki thaw kiwa da pait neibynta yong ki wei da wan pait i leh ya kawi ka thaw yong ka chnat Transport kawa ha Police Bazar wei yo i wa man ko ka thaw kawa biang,” da ong u Montri.
Chooh chooh da pynrap u, “Hap kynjoh ktien i ya ka chnat Transport wei lada em i krehlang, daw chna i ya katai ka thaw ka wow man du neibynta kiwa dai madan.
Discussion about this post