Jowai : Hadien wa da khang ki bor District wa ki pulit ka West Karbi Anglong District u kreh ya ka yingkieñ Kurliya ha ka wah Myntang, Tihwieh ha ka 24 tarik Thohlakhmi (February) 2016, ynne ka sngi 1 tarik u Wisu ki bor District West Jaiñtia Hills hei yahkhmat u Addl. DC D. M. Wallang wa u Superintendent of Police ka West Jaiñtia Hills u R. Muthu da hiar ki cha ka tai ka thaw yow peit yow sylli yei kynrum kynram.
Hei yaklam wa u D.M. Wallang da ong u wa neiliang ka bor District dang yang ko ya ka wyrta na ka bor sorkar Meghalaya hadien wa da phah ya ka yutip cha ka.
Heijooh i por hadien wa da tip ya kani ka khubor wa da hiar kini ki heh District, neiliang u ma Rikut Pareiñ uwa man leh kam u Secretary ka Pangam Raliang Border Development Committee (PRBC) kamjooh leh kam u President ka JSU chiroop wa ka FKJGP (JH), JYF, HNPF (JH) da kyntu kynpham ki ya ka sorkar wa ya ka tnat PWD wow kreh bait ki ya kani ka yingkieñ khlem sangeh yow myntoi ki paidbah ka thaiñ.
Kamjooh leh ki tai ki seiñbhalang da kyntu ki leh ya ki pulit yong ka West Jaiñtia Hills wow e ko ya i yada ya u contractor kamjooh ya ki wa kreh yong oo ha katai ka thaw.
Kam wow pynkynmoo heini wa ya kani ka yingkieñ da sdang u chna nadooh Naiynniaw 2009 tangwa dang sahteiñ hadooh katni neidaw wa u contractor wa nyngkong uwa na Assam da yap u dep neitæ da chim kti da u khon yong oo.
Uni u khon u leh ym ye u pyndep yei kreh, katwa kamtæ ka sorkar da pyndaam ko ya oo wei wa da khut tender ko deiwi tawan ha ka wa u ma Pyrkhat Hinge da yoh u wow u kreh ya ka tai ka yingkieñ.
Kat u yoo mynda kreh u wan pynwit ki pulit Assam deiwa hukum u DC ka West Karbi Anglong u pynsangeh chwa yei kreh.
Discussion about this post