Shillong: Ka Congress daw pynman ko da ka Meghalaya Campaign deiwa lai sylli cha ki bynta waphær waphær ka jylla, wei kani ka Campaign toh yow lai pait yei wym hoi i krehkaam ka sorkar, iwa da wanrah yei chrai ya kiwa chong chnong wa ki khynroo khyllood ka jylla.
U Dr. Mukul Sangma uwa man uwa yahkhmat ka liang pyrchah ha Meghalaya Assembly, da ong u wa kani ka sorkar da chukor ko ya ki paidbah ka jylla wei khamtam ya ki khynroo khyllood kiwa em katni i chrai neidaw wym biang i kaam i jaam. Da khut u leh ya ki seiñ wakreh mon sñiawbha wa ya ki bru samen kiwa em ya i kitkhlieh neibynta i bha i miat yong ka jylla.
Da ong u wa kani ka sorkar da thmu ko wow wanrah ya i por wa ka jylla ym kwah de wow kynmoo, neibhah i wym biang i kaam i jaam da wanrah leh yei wym chong suk ha ka jylla. U Dr. Mukul da kylli u leh wa ha kini ki 2 snem tam wa da lai katwon tylli ki kaam wa ka sorkar da pynmih ko khamtam ha ki ar tylli ki chnat, kitæ ha ka Education wa Police Department.
Uwa yahkhmat ka Congress da ong u wa lada kwah wa ka jylla u em ko ha i chong suk chong saiñ, ka sorkar toh u e kyrmen ko ya ki paidbah deiwa wai ya ki laad ki luti neibynta kiwa chong chnong, tangwa lada e laad wa ka jylla daw chah lute cha pynsih ko daw man ko i khanglaad ya ka jylla.
