U Jamshaphrang Pohtam, u MDC ka Liang Pyrchah ka JHADC, ha ka Dorbar Lyiur wa chi sngi ka Council ynne ka sngi, da wanrah u ya ka mat yatai wa lada i e laad u khih kreh ki baar jylla hapoh u pood u ang ka Council man hi mo i myntoi, deiwa ong wa hei yoo yong oo ka Ri-loom Jaiñtia da chah hiar thma ko hei khayi pateiñ neibhah wa boon ki yaaw wa da pynlai da ki baar jylla iwa man ka dak i tim ya ki tre ri.
Ong u ini i e laad ya ki baar jylla ktah ko ya ki khon khynroo khyllood, ki tre ri tre chnong wa kwah u seiñ khih ha kini ki sngi wa duna i yoh kreh sorkar.
Hawa kyntu ya ka District Council u thooh ko ki laad luti u pynkhlan yei khayi pateiñ da ki tre ri ym em mut u e laad da kiwi ki jaitbru, da kyntu u leh ya ka JHADC u pyndam noh ko i e Trading License cha ki baar jylla wei wow dam noh leh u pynthymme ya ki warim.
Heiwa da kdaw u leh ya kiwa leh Benami deiwa ong kini man ki kam ki thlen wow ngooid ya ka jaitbru.
U Andrew Shullai hawa chimbynta wow yatai, da e yumut u wa ymtoh de u e laad soi NOC du u waheh chnong samen tangwa toh u embyntalang leh kattu katni ki dkhot EC chnong khnang yow em i pyrkhatlang ki boi man leh ka laad wow ye u pynduna, neibhah kamwa da jia chadien neidaw wa i bor wow soi NOC chong du samen ha u waheh chnong em leh ki khep wa wan booddien ya ki kot ki sla yong ki Non-Tribal cha JHADC pyn da ki waheh chnong hi.
Kiwi won ki MDC Liang Pyrchah wa chimbynta u yatai ya kani ka mat kynthup ya u Rikut Parieñ, u Daeimi Liam, ka Deiwipaya Tongper wa u Soki Lapasam.
Neiliang u EM, u Jesse Suiam hawa pynche ong u kani ka mat man ko kawa kyllaiñ wa ye leh u ong lada chong leh jhieh lada yeiñ leh tyngkhoo, neibhah lada e leh chah pynbaad lada dam leh chah pynbaad.
Ong haroh u ki jaitbru yong i dang duna kiwa wan chakhmat u seiñ khih, wei heiyatoh kiwa leh Benami won leh ong u em ki khep wa ki bru yong i ym ye ki u khih samen, neitæ i e Trading License leh man ko kawa pynmyntoilang ya ki bru yong i, wei hawa e License ym pu jooh lai lait ki leh na ki kyndon ka Council najrong wym em leh khanglaad ya ki bru yong i u khih kreh ki.
Neiliang u CEM, u Thombor Shiwat won hawa pynrap ong u ka Trading License yarap ko wow pynmyntoi ym du yaka Council tangwa kamjooh leh ya u paidbah.
Wei sñiaw yahaap u leh yei e yumut uwa yahkhmat ka Liang Pyrchah wa jooh wan kdong NOC cha Council da ki bru yong i hi, kamtæ e yumut u wow rah pynbha pynmiat ya kani ka bynta cha ka Select Committee kawa da thung kyrpang neibynta u chna pynbha yei krehkaam wa i bor ki waheh chnong.
Wei hadien wa dep pynche u EM kamjooh u CEM, neiliang u Jamshaphrang da hun u wei da pyndam noh u ya ka Motion.
Discussion about this post