Shillong: U Montri wa pait ya ka chnat khloo kamjooh ya i kaam pohyung ka jylla, u Lahkmen Rymbui da ong u wa man ko kawa pyrchah yaka aiñ ya kiwon kiwon ki kynhun næ ki pulit CRPF wow toor cha ki khloo wa da booh wow pynneh kyrpang ya ka rymaw. Ini i klam yong oo toh hadien wa ka dorbar chnong yong ka Mawlai Phudmuri ha i yahkhmat u MDC, u Teiborlang Pathaw ynne ka sngi da lai ki wow ujor hajrong i kam thaw ki pulit CRPF ha ka khloo sorkar kawa em ha katai ka chnong.
Hawa kylli, da ong u wa i thmu wow booh ya ka Health Park næ i thaw lai pynngaad da ka sorkar ha katai ka khloo daw hap wow bichaar bniah bha lada booh ya ka Health Park ye ko wow ktah næ ym ktah yaka rymaw, wei ka chnat kwah ko wow ya krehlang wa ka chnat pynroi ka sorkar wa kynthup ha ka Smart City wei ym ya tyngkhooh ko waka aiñ Forest Conservation Act.
Hajrong i ujor yong ka dorbar chnong Mawlai Phudmuri, u Rymbui da kular u wow chimkhia wei ka chnat ym chong klikti ko ya kam ini i tooh thaw yow lait u jia i hadien habood.
Ujor ka dorbar chnong wa u MDC
Neiliang u Teibor da ong u wa ha katai ka khloo da em ka um kawa man kam ka um dih wa heijooh i por leh ka ja kpoh yong kiwa chong chnong, wei da i yoh lai laitlan yong ki CRPF kiwa lai wow sum leh ha katai ka thaw, ye ko wow pyntngit ya katai ka um.
Da ong u wa i lai laitlan yong ki CRPF da wanrah ko leh ya i wym chngaaiñ ya ki khynnah wa ki manbei kiwa lai tongum wei sait-that ha katai ka um.
U MDC da pyntip u leh wa neiliang u Montri da kular u wow khang noh sbak ya i kynroh wa da pynpra da ki pulit CRPF.
U Sylvester Kurbah uwa man leh u waheh chnong ka Mawlai Phudmuri, da ong u wa ki pulit CRPF da pynhaap ki leh ya ki dieñ ha katai ka khloo wei kamjooh da ktah bha ya i tooid i tngit wa ya ka um ha katai ka khloo.
Da ong u wa i lai ujor cha u Montri sorkar toh yow lait u mih kiwon kiwon ki pyrchah tangwa lada ki pulit CRPF leh yabor ki, ka chnong ym yohsa ko wow yakhun pyrchah.
Hawa yatoh won wa i thmu wow chna yaka Health Park, da ong u wa lada mankaam daw e myntoi chiboon ya ki paidbah ym du ya kiwa na Mawlai, wot ya kiwa na sor Shillong kamjooh neibynta i chait i khiah, wei daw yarap ko leh ya i yoh kaam ki khynroo khyllood ka chnong.
