August 24, 2020

Lai bait ka Behdieñkhlam ka Raij Mukhla ynne ka sngi Musiang

by Wyrta Staff

Advertisement ad1

Ka Lehniam Behdieñkhlam ka Raij Mukhla kawa soo sngi heiwa ynne ka sngi Musiang kawa man leh ka sngi wa le da man ko kawa lai bait heiwa ki waheh wasian ka Raij wa da jied kyrpang, da mih ki dang step wow lai rah ya ka Dieñkhlam na Umlangshor Mukhla ryngkat wa ki waheh na ka chnong Umlangshor neibynta wow pynyieñ ya ki ha Madan Slot Masi Madan Ryngkaw wei hadien wa wan pynpoi ya kini ki Dieñkhlam na Umlangshor Mukhla da yoh wow pynyieñ ya ki le tylli ki Dieñkhlam ynne ka sngi.

Nyngkong da pynyieñ chwa ya u dieñkhlam ha Madan Tihkhyndaw Wahshnong kawa man ka Dieñkhlam Tre Duwan Blai wei hadien won da pynyieñ ya ka Dieñkhlam ka Chnong Mukhla Nongrim wei da pynbood won sa kawa na ka Umlangshor Mukhla.

Hadien wa da dep pynyieñ ya ki le tylli ki Dieñkhlam, neiliang u Langdoh Niam ka Raij Mukhla da pyndep biang u ya ka Dorbar Niam ha Madan Slot Masi Madan Ryngkaw neibynta wow pyrkhat ya ki kaam kiwa dang hap wow leh neibynta ka sngi ka Muchai kawa man leh ka sngi wow pyndep ya kani ka lehniam Behdieñkhlam wa chisien chi snem ka Raij Mukhla.

Ya kani ka yalang da chimbynta da u Langdoh Niam ryngkat ki Waheh na ki Sankur ka Raij Mukhla, wei kiwa yoh wow chimbynta ha kani ka yalang wa ha ka lehniam Behdieñkhlam toh du ki waheh kiwa dadep jied kyrpang da ka Raij donhi, katwa kamtæ ym chah ya kiwi tawon ki khon ka Raij wow chimbynta ha kini ki lehniam.