U Chief Executive Member (CEM) yong ka Khasi Hills Autonomous District Council (KHADC) uwa man leh u dkhot yong ka High Level Committee (HLC) da mynjur u hajrong i thmu yong ka sorkar jylla wow kyrriah noh ya ki bru kiwa chong wa sah ha Them Iewmawlong ya kawa da tip kam ka Harijan Colony.
Hawa yaklam wa u CEM, u Titos Chyne da ong u, “Nga leh toh u dkhot ka HLC wei da embynta hei wow e yumut ya ka sorkar wow kyrriah noh ya i thaw sah yong ki bru na katai ka thaw cha kawi won,” da ong u.
Kani ka thaw haap ko hapoh ka Hima Mylliem wei hadien i yachem boonsien yong ka HLC, da mih iwi i yumut wei itæ toh wow kyrriah noh ya ki Khar Mator wei wow e wai ya i thaw cha ka sorkar khnang wow ye wow chna da kiyi kiyi ki wow e myntoi ya kiwa chong chnong ka jylla, da pynrap u.
I thmu wow kyrriah ym toh wow lehbeiñ ya kiwon kiwon wei ki bru wa sah ha katai ka thaw leh toh u sñiawthooh ki, “Tangwa nga lyngngoh O wa ileh wa mih i ya sñiawphær jaitbru hajrong kani ka phang, i thmu toh du wow kyrriah ya i thaw sah yong ki bru kiwa kreh wa ki chnat sorkar cha kawi won ka thaw wa ka sorkar da dep pynkhreh ko khnang wa katai ka thaw u man ko kawa kyllooid wa kawa khooid wei kawa chngaaiñ,” da ong u Titos.
Da pyntip u leh wa ka HLC da e yumut ko wow ekti ya katai ka thaw cha ka ka Urban Affairs Department khnang wow ye u leh iyi iyi wow pynmiat wei wow e myntoi ya ki paidbah ka jylla.
“Kamwa man katni, katai ka thaw da kylla man ko kawa da booh dukan pyrchah ya ka aiñ wei da man i i wym chngaaiñ de ya kiwa lai wa wan wei ki kaam wa sih da mih ki na katai ka thaw”, da ong chooh chooh u.
Da ong u wa katni chong sa du ha ka sorkar wei toh u lai bait ya iyi wa ka HLC da e yumut ko.
