Ka Meghalaya ynne ka sngi da lehkmen ko yei dap 50 snem i yoh man jylla ha ka yalang wa da pynman ha JN Stadium, Shillong. Heiwa u Montri Rangbah, u Conrad K Sangma da chibynta u lyngba ka Internet wow e yei klam. Neiliang u Prime Minister, Narendra Modi leh da phah u ya i klam lyngba ka Video Conference. Katwa ya ki kyntien u Lat ka Meghalaya da puræ ya ki ha kani ka yalang.
Ha kani ka yalang da wan wow chibynta lang da u Symbood Montri Rangbah, u Prestone Tynsong, u Meghalaya Legislative Assembly Speaker, u Metbah Lyngdoh, uwa yahkhmat ka liang pyrchah, u Dr. Mukul M Sangma, u Rajya Sabha MP, u Dr. W. R Kharlukhi, ki Montri sorkar, ki MLA, ki MDC, ka Meghalaya Chief Secretary, ka RV Suchiang deilang wa ki heh ka sorkar jylla, sorkar pyrdi wa kiwi kiwi de.
Ha kani ka yalang da pynlait paidbah leh ya ki kot ki sla wa khana yei parom yakhih yoh jylla, da pynlait leh ya ka State Emblem, ka Stamp ka jylla. Da booh mooyurim ya ka thaw thymme wow chna ya ki yung krehkaam sorkar namo ka New Administrative Township.
Da pynlait paidbah leh ya ka phlim wa khana yei parom yakhih yoh jylla wa pynmih da ka Directorate of Information & Public Relations, Meghalaya; da em leh ka leh Drama wa da e pyrtuid ‘Meghalaya: Yesterday, Today & Tomorrow’ wa leh da ka Department of Arts & Culture, Meghalaya; i pynbna wa i saam ya ka khusnaam Meghalaya Day Awards cha u Benedict Skhemlang Hynniewta (U Tirot Singh Award for Arts and Literature), cha u Father Charles Ch Sangma (Pa Togan Sangma Award for Social Services) wa cha u Halen Nongtdu (U Kiang Nangbah Award for Sports) kiwa man leh ki Meghalaya Day Excellence Awards wei da khang tala leh ya ka synduk Memory Crate wei da yoh leh yei rwai na ka Shillong Chamber Choir.
Neiliang u Conrad hawa e yei klam da kynmoo tympang u ya kiwa seiñ ya ka jylla kam u Captain Williamson Sangma, u D.D. Pugh, u B.B. Lyngdoh wa kiwi de kiwa yahkhmat ka Hill State Movement.
U Conrad da pyntip u najrong kiwa boon ki kreh wa daw wai ha kini ki sngi wow wan, daw wai leh ya ka IT Park yow ye u sdang ya ki kreh BPO wa kiwi kiwa yatoh wa ka IT wei daw yarap pynyoh kreh ko ya kamwa 1500 ngut ki khynroo ha kini ki bnai wa daw wan.
Da khana u leh wa ya ka Shillong Government College of Engineering waka College of Architecture & Urban Planning, Tura daw pynkrehkaam noh ki ha uni u snem.
Chooh chooh daw sdang ya 300 tylli ki kreh nadooh ki chna sarok, chna skur, ki thaw sumaar, kiwa yatoh wa i chait i khiah, i rep i riang kiwa daw wai ha waroh u snem iwa da man awjan kawi chi sngi ha uni u snem.
Da pynbna u leh wa daw sdang u chna ya ki sarok chnong hapoh ka chnong Tura, Williamnagar, Jowai wa Nongstoin.
