U President ka Khun Hynniewtrep National Awakening Movement (KHNAM) uwa man leh u MLA ka North Shillong Constituency, u Adelbert Nongrum da ong u wa toh i kaamram yong kiwa katni wow leh iwon iwon neibynta ka mynried deiwa ong wa da noh u charood yei kwah burom, neibhah wa da yoh ya ka jylla tangwa ki paidbah dang paan ki yei hok hadooh katni.
U Adelbert da sdang u yei yakhih kylleiñmyngngor wa 5 sngi ha Madan Malki nadooh ka 17 tarik wei u kut ko mynstep ka sngi heipor 10 waje i step, wei ynne ka sngi da pynman da ka yalang paidbah ha i thaw wa pynman ya i yakhih.
Hawa klam ha kani ka yalang da ong u wa sñiawsih u wa kam ka jaitbru kawa kam wa da dap 50 snem da sai ko ya kiwa yahkhmat kiwa kam toh ki ‘Leader’ da man pathan ki kam ki ‘Dealer’, kiwa yoo jngai du yei yong samen, kiwa phrat luti samen na kawi cha kawi ka Constituency, na kawi ka lama cha kawi wei da kyrriah ki leh boonsien ya ki yurim du wow pynskem ya ka chuki.
Ka yakhih wa 5 sngi toh hajrong 5 tylli ki phang wa da booh u ha ka sorkar kiwa kynthup ya i bhah thung kreh, i pynku ya i rta yaleh kreh cha ka 37 snem, wow em noh ki sahep IAS, IPS, IFS yong ka jylla (Meghalaya Cadre), wow pyndep noh ya i kular wow kyrriah ya ki bru wa sah ha Them Metor wei wow pynbait noh ya u pood wa ka jylla Assam.
