U Montri Rangbah ka jylla, u Conrad Kongal Sangma da kyntait u warr yei pynbaad wa em i joor i baam tooh yaka poisa hajrong i pynkrehkaam yaka Eco-Tourism Project kawa dapoi hadooh Rs. 13 klur hapoh ka jylla.
Hawa klam cha ki laad pathai khubor, u Conrad da ong u wa katkam wa da tip wei da chim yukheiñ wa i pynmih ha ki laad pathai khubor toh i wym toh wei iwa yah bakla. Da ong wa ka Project toh kawa chongdor Rs. 13 klur ym kamwa da pynmih hadooh Rs. 1300 klur, da pynche u leh wa em kamwa 8-9 tylli ki thawa wa ki kreh dang lai ki.
Katkam wa khana u Montri Rangbah, kani toh ka Project wa da kyrchaan poisa da ka NEC ha u snem 2017 chuwa wa ka sorkar MDA u wan ko hei bor synchaar ha u snem 2018, wei kiwa boon kiwa da tei da chna toh kiwa da jan dep, lait noh kattu katni kiwa dang sah ki kaam malu mala wa kiwa dang sahkut i su.
U Conrad da ong u leh wa ym man iwa bha wow pynbaad hi-eh wa kynroi ka baam tooh, neibhah ym em iwon iwon wa kam katæ wei kiwa boon ki kaam toh kiwa da dep wei ka song poisa leh ymtoh kawa hadooh Rs. 1300 klur.
Da pyntip u leh wa da phah yei maham cha kawi ka laad pathai khubor kawa da pynmih yeini i thoh, deiwa ong wa ini i rukom thoh toh iwa khlem i kitkhlieh wei toh u syndong ki wow thoh deiwa sakhiat.
Discussion about this post