theme-sticky-logo-alt
theme-logo-alt
Advertisement ad1

I pynbait pood toh i kaamram ki sorkar jylla ym toh iwa mih neidaw ki jaitbru: NESO

Ka North East Students’ Organisation (NESO) kawa kynthup lang ya ka Khasi Students’ Union (KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) wa ka All Arunachal Pradesh Students’ Union (AAPSU) da pynsñiaw ki yei sñiawsih wei yei ym sñiaw ye ngait dei ya iwa jia ha khappood ka Assam-Mizoram deiwa beiñ leh ya iwa jia hadooh wa da dooh yei mynsien bru, kamjooh da mynsoo leh boon ngut wei da ktah leh ya ki thaw ki bhaw.

Da ong leh wa ini i jia da pynkhih ko ya waroh kawi ka thaaiñ Northeast iwa da poor kam i diñ wei ini i jia ha u pood ka Assam-Mizoram da pynkynmoo ko katwon booh ko hei maa ya kiwa sah khappood manda mih i kynaad.

Da kdaw leh ya kiwa da jia nadooh nachwa ha khappood ka Assam-Meghalaya, Assam-Nagaland wa Assam-Arunachal Pradesh iwa da wanrah yei chah ktah ya waroh kiwa chong chnong khappood ha waroh arliang. Da ong leh wa da dooh ya ki mynsien yong kiwa boon ha Meghalaya ha u snem 2010 hadien wa mih i awri awra hapyrdi ka Meghalaya wa Assam wei ym em hi man chngaaiñ ha u pood ka Assam-Nagaland wa Assam-Arunachal Pradesh. Wei da yoosar wa i yaklam pynbait pood ym em ye ko wow pynbait ya i eh wa mih na u pood.

Ka NESO da ong ko wa neiliang yong ka da phah ko chiboon ki thoh yow pynbiat noh ya u pood yow ye u wanrah ya ka chongsuk ki jaitbru wa boon ka thaaiñ Northeast.

Ka NESO da kyrpaad ko leh ya ka sorkar pyrdi wow tuklar ha ini i jia neibynta i bha i miat yong waroh heiwa ini wa dep leh da dep phah yei thoh cha u Union Home Minister, u Amit Shah heipor wa wan u cha Meghalaya.

Ka NESO da khut ko leh ya waroh ki jaitbru ka Northeast wow kynmoo ki wa ini ymtoh i sñiawyaphær jaitbru tangwa toh i kaamram ki sorkar jylla wow pynbait ya u pood. Wei lada smat wow chem ki laad wow pynbait ya u pood deiwa ya hunlang, daw ye u wanrah biang yei chongsuk hapyrdi ki jylla wa kiwa chong chnong ki jylla ha khappood yow ye ki u im dei suk.

Share this:
Previous

Pynchlur ka DC wow lai chongkset ha ki CCC

Next

Kyntu ka sorkar Assam ya ki paidbah yong ka wymtoh u lai cha Mizoram