Shillong: Ka BJP Meghalaya ynne ka sngi da lehkmen ko yei dap chi snem i pyndooh ya poisa T. 1000 wa T. 500 ha ka ri, kawa da leh da u montri rangbahdooh ka ri India u Narendra Modi.
Hawa klam wa kiwa pathai khubor u president ka BJP u Shibun Lyngdoh da ong u wa i pyndooh ya ka poisa da u Modi da wanrah ko kamwa 99 percent ka poisa tooh cha ka poisa hok heiwa da haap u lai biang cha ki bank na ki thaw wa booh tooh ya kini ki poisa thok.
Ym du itæ tangwa da khanglaad leh ya kiwa chim kabu wow baam-tooh ki heiwa ki kaam ki seiñ kieñ suloi da sdang duna bha ki khamtam ha ka Kashmir, Chhattisgarh wot ha kani ka jylla Meghalaya leh.
Da pynbaad u wa ka sorkar UPA kawa yahkhmat da ka Congress ha u snem 2005, da thmu ko wow pyndooh ya kini ki poisa tangwa ym embor ko wow leh ya ini wei du heipor wa man Montri Rangbahdooh ka ri u Narendra Modi da ye u pynkrehkaam yeini wow pynkhooid ya ki kaam baamtooh wa kiwi ki kaam wa man pyrchah ya ka ri.
Nadooh wa pyndooh ya kini ki poisa i wan ka poisa cha ki bank leh da ku bha i hadooh kattæ kattæ wei ini da pynku sakhiat i yei yoh i kot ka ri neibhah ka poisa krehkaam ko wei ym chong de ko du ha ki bru kiwa baamtooh.
Ka BJP da pyrchah ko ya iwa leh ka Congress ynne ka sngi deiwa ong wa da neidaw wa chah ktah joor ko ya ki neibhah wa boon ka poisa tooh yong ki wei ym yohsa ki haap ki wow mih madan wow pyrchah khlem pyrkhat yei myntoi wa yohy ki paidbah.
Da ong u leh wa ha ki 50 sngi wa yaichah ki paidbah da wanrah ko yei myntoi pyn yaki hi deiwa kyrmen u leh wa ki kyrtong u pynduna ki u pynemkaam da ka poisa ha kani ka election wow wan ha u 2018.
Discussion about this post