Jowai: U Adelbert Nongrum, MLA ka 17-North Shillong haka kyrwoh khubor wa da phah u, da ong u wa i thmu yong ka Citizenship (Amendment) Bill (CAB) toh yow booh cha rood wei wow pyndoohjait yaki khian paaid kiwa man ki tre chnong hei pyrtuid ka niam deiwa pdiang ya kiwa yut ri kiwa na Bangladesh, Pakistan wa Afghanistan. I pynkylla yaka Citizenship Bill da pynemkaam yaka yow pynksan wow pait yaki bru hei pyrtuid ka niam.
Da ong u wa kiwa pynwandur kiwa chna yaka Constitution ka ri da ban joor ki yei emkaam ka rukom synchaar ha kyrdan ki chnong ki thaw yow pynneh pynsah yaki rukom im waki dustur riti waphær waphær wa em chaka thaaiñ yong i. Ya ini da mynjur wei da booh wei da tipmit yei rukom synchaar hapoh ka Constitution. Kattu lada pynkrehkaam yaka CAB, waroh ini daw wiar noh i heiwa i hok wa i myntoi daw dooh noh hei pyrtuid ka niam. I pyrchah yaka CAB ym toh du ya kani ka Bill tangwa yow pyrkhat yei yi wow jia hawroh ki liang lada krehkaam ko.
Da kdaw u leh ya i daw wa kani ka thaaiñ em ko u pood wa kiwi ki ri. Heithaw wow yada yei hok, ka CAB daw wai ko yaka dwar pynyaphær jaitbru wei pynyoo yei tlot ka Constitution ri deiwa khlem pyrkhat chwa ya ki paidbah kiwa da em chwa da ki spah snem ha kani ka thaaiñ. Lada em kiwa yut ri kiwa chah lehbeiñ hei pyrtuid ka niam, toh u paan yarap na ki ri ka pyrthai.
Chooh chooh da ong u wa ka thaaiñ mihsngi toh kawa em ki jaitbru wa boon jait kiwa man leh ki tre ri India, da kylli u leh wa lada ka Act-East Policy daw tympra ko ya waroh kawi ka thaaiñ? Neidaw wym bien ka sorkar India wow pait palat yaka niam, kiwa daw chah ktah dooh toh ka thaaiñ North East, ya ini da yoo chwa wa ka CAB ym em thong ko lait nei tympiah yaka North East.
Da emkaam wow khyrngiat noh waroh kawi ka North East ya ini i rukom pyrkhat ka sorkar India, wei emkaam wow ya tylli wei emkaam wow wanrah yaka aiñ wow yada ya ki khian paaid deiwa pynkrehkaam yaka Inner Line Permit (ILP) lym kamtæ waroh kawi ka North East daw kop diñ ko.
Discussion about this post