I yoo sih yong i ya kiwi ymtoh u man ko i tim yaka jaitbru: Dr. Fenela

Ka Dr. Fenela L Nonglait kawa man leh kam ka muktiar, da man ko kam kawi na kiwa paan Tiket naka seiñ BJP wow yakhun yaka MP Election cha ka Lok Sabha na Shillong Parliamentary Constituency wei yeini da pyntikna ko ynne ka sngi hadien wa da yaklam wa kiwa thoh khubor.

Ka Dr. Fenela kawa man leh ka Christan wa ngait niam bha, da man ko leh kawa yasaaid aiñ ka Supreme Court, wei da psiah ko cha ka BJP hadien wa ka Party da pdiang ko ya ki kyndon wa da booh, kiwa kynthup wow tipmit yaka soskular hapyrdi ki Hima Khasi waka sorkar India ka Instrument of Accession (IoA), yow pynskem yaka riti dustur, ka khyndaw u chyiap, yow pynlait na ka Uniform Civil Code (UCC) hapoh ka jylla, yow pynpsiah ya ka ktien Khasi ha ka 8^th Schedule ka riti synchaar ka ri, u pynkrehkaam ya ka Eastern Bengal Frontier Regulation Act 1873 kawa tip leh kam ka Inner Line Permit (ILP), yow pynlait na ka Right to Fair Compensation and Transparency in Land Acquisition, Rehabilitation and Resettlement Act, 2013 neibhah daw tynyap ko yaka Meghalaya Land Transfer Act 1972.

“I emkaam wa jhan yaka jaitbru toh ya kini ki aiñ. Nga ye O u sdang heipor wa dang khynroo, i por wow yakhun Election em ko chiboon tangwa iyi wa pynman ya nga toh wym ye de O wow yang yei por neibynta ka jaitbru, i por yong ka jaitbru toh kawa emkaam jhan wow yada da ki ain”, da ong ka Fenela.

Da ong ko wa i sang næ i yoo sih ya kiwi ymtoh u man ko i tim yaka jaitbru neibhah kam ki Christan toh u maya ya kiwa choon yow yoh u khang ya uwa tooh napoh wei ini man ko iwa bha tam bar ya kaw kaw.

Related posts

Ka sorkar ymtoh kawa ye hi-eh ka KSP wow maham: Sniawbhalang

December 21, 2024

Da u waheh chnong uwa man leh uwa yahkhmat seiñbalang sai kyrtong MDC ka Namdong

December 21, 2024

“I yoo sih yong i ya kiwi ymtoh u man ko i tim ya i. Nga psiah O cha ka BJP kam ka Christan, kam ka khian paaid, kam ka Khasi, kam ka kynthai. Nachwa nga man chongchit O kam ka Orthodox Christan tangwa katni hap wow man kiwa chemphang wa man Diplomatic yow yakhun da ka buit. Boon i yatyngkhooh ha ka aiñ ymtoh neidaw ka sorkar BJP tangwa wa yaleh i para Christan hi. Ka Election ymtoh ka kaam wow yalehke tangwa toh u sñiawthooh wa toh ka thmabah ka jaitbru”, da ong ko.

Da ong ko wa lada kam ka jaitbru sñiawthooh i yei maa, toh u e laad ya ka wow lai yasaaid ha Parliament wei wow yakhun yei dawa ka jaitbru ha ka sorkar BJP kam ka MP.

“Da em boon bha i pynbaad ya nga ha kini ki sngi wa nga da psiah BJP O toh wa chah thied dor syad tangwa i dor ka jaitbru toh ka wym ye u thied næ dai”, da ong chooh chooh ko.

Ym em yumut wow ya kaw kaw maw maw ha madan yow yakhih manda dep wow man aiñ, tangwa emkaam wow chim chwa yei yada, wei iwa emkaam toh ka sur kawa khlan ha Parliament ymtoh wow yoo sih ya man pathan ko i tim yaka jaitbru.