Shillong: U MLA samen na Gambegre, u Saleng S Sangma ynne ka sngi da ieh noh u yei man u kam u MLA wei da chimkti wot u ya i kaam u President ka NCP Meghalaya. U Saleng da man u u MLA wa 14 wa da ieh noh yei man MLA hachwa wow yakhun u ya ka Election kawa daw pynman noh.
U Saleng da ekti u ya ka chithi wa da iehnoh u yei kaam MLA ha u Commissioner & Secretary ka Yung Dorbar, u Andrew Simons ynne i step wei hadien ini da thung noh ya oo kam u President ka NCP Meghalaya heiwa ka Party da pynkup burom ko ya oo ha yungkrehkaam ka Party wa em ha Laitumkhrah.
U Saleng da chimkti u ya ini i kaam hadien wa u Sanbor Shullai uwa jooh man kam u President waroh chi kattu da chah pyndooh u yeini i kaam neidaw wa da psiah u cha ka BJP.
U Saleng da ong u wa ka thong yong oo toh wow pyknkhlan ya ka Party hadien wa kiwi ki wa yahkhmat ka Party da psiah ki cha kiwi ki Party.
Da ong u wa ka NCP ym kwah ko wow kam kamwa leh kiwi ki Party wa daw jop ko hadooh katwon ngut wei chong ko ha ki paidbah katwon ngut u pynjop ki wei kitu kiwa da mih naka Party toh neibynta wa pyrkhat ki yei yoh myntoi samen ki ymtoh ya ki paidbah.
Da kyntait u leh waka NCP toh ka party Garo nadooh wa da seiñ ya ka da u (T) Purno A Sangma deiwa ong wa heipor wa man State President u Sanbor Shullai ym em wa ong wa ka NCP ym toh ka Party Khasi. Da ong u leh wa ini toh du nei klam yong kiwi ki Party wa pynbaad khlem yurim.
Heijooh i por da kynthah joor u ya ka Congress khamtam ya u Montri Rangbah u Dr. Mukul Sangma deiwa kam wa da pynchitom u ya ki paidbah da ka Scheme thok kawa da saam cha ki paidbah katwa i sakhiat kani ka poisa man ko ka ram wa ki paidbah haap ki u pynuiñ biang kawa da wanrah ya i khuslai ya ki paidbah. Da pynbaad u leh wa waroh ki tip ki wa u Dr. Mukul Sangma man u bru wa mahajon tangwa wow wanrah ya ki kaam pynroi ya ka jylla ymtip u iyi iyi leh.
Ha kani ka sngi, ka NCP da pdiang ko leh ya u wa yahkhmat ka BJP na Pynthorumkhrah u Predecessor Rumnong uwa da yah lang waka Junas Jyrwa, u H Kharmuti uwa man kam u President ka BJYM Pynthorumkhrah, u Batshanbor Wanswett deilang waka Darihun Marbaniang kawa ksoh kam ka President ka BJP Shillong Mahila Morcha.
Da pdiang leh ya u Ronal Dkhar ka UDP na Nongthymmai, u Vikash Gupta ka BJP na Laban wa ya u John Sangma na Ranikor.
Da pyntip leh wa u Praful Patel uwa man kam u General Secretary ka NCP daw wan u cha Shillong mynstep ka sngi wow yachem wa kiwa yahkhmat ka Party wow yachong phyllu yumut heiyatoh wow pynkhreh ya ka Election MLA wei daw booh u leh ya u moo-yurim wow chna ya ka yung krehkaam ka NCP kawa em ha Biver Road hajan ka yungkrehkaam ka BJP.
Discussion about this post