Shillong: U President ka Bharatiya Janata Party (BJP) Meghalaya, u Ernest Mawrie da kyntait wa em i piah ha ka Party, deiwa ong wa waroh ki rai wa da chim da ka Party da leh deiwa tiplang kiwa yahkhmat ka Party deilang wa ki MLA.
Hawa kylli hajrong i yaphær hapyrdi ki MLA ka Party wa kiwa yahkhmat ka BJP ha ka jylla, hajrong i pynbaad baamtooh ya ka sorkar MDA, u Mawrie da ong u wa i klam yong ki ar ngut ki MLA, kitæ u AL Hek wa u Sanbor Shullai toh i sñiaw samen yong ki, wei ym toh wa pyrchah ki ya i rai ka Party.
Hawa yatoh wa i ong u Prestone wa ka BJP ye ko wow mih lada ym sñiawhun ko ha ka sorkar MDA, u Mawrie da ong u wa ini i rai wow mih na ka sorkar chong i ha kiwa yahkhmat ka Party na Delhi.
Ka BJP ynne i janmiet da lum ko ya ka yalang yong ka Core Committee hei ya emlang u National Vice-President ka BJP wa pait leh ya ka jylla Meghalaya, u Dr. M Chuba Ao, wei katkam i pyntip u Mawrie, ha kani ka yalang da yaklam boon ki phang wa yatoh wa ka Party, tangwa da kyntait won u wow pyntip cha ki laad pathai khubor.
Hawa yatoh wa i pynbait ya i wym sñiawthooh hapyrdi ki MLA wa kiwa yahkhmat ka BJP, da ong lyngba i wan u heh ka BJP, da kyrmen u wa daw ye u pynbait noh.
Ha i jooh i por uwa yahkhmat ka BJP ha ka jylla, da pyntip u wa neiliang u Vice President ka BJP da kyntu u ya ki wakreh ka Party wow nang krehchitom neibynta wow yoh yei jop ha ki Election kiwa em ha ka jylla.
