Wahiajer: Na ki 32 tylli ki kynhun kiwa wan chimwynta haka 3rd Wahiajer Open to all invitation knockout Football Tournament kawa sdang nadooh ka 17 tarik u Ñaisaphra, ka kynhun Bornly Football Club da ioh ko u rah ia ka iaka nam wajop iong kani ka lympung kynjetbol deiwa pynrem iaka Eastern Football Club.
Ia kani ka kynjetbol da pynlai da ka Wahiajer Sports Club West Jaintia Hills District wei ia ka iakhun phainal da pynman ha madan mini stadium ïong ka shnong Wahiajer.
Hawa khyruin cha ka iakhun hapyrdi kini ki ar kynhun da man ko kawa noh chiliang, haka kylla step hadien tang kattu katni por wa sdang ia ka ialehke ka Bornly FC da ioh ko u pynkhih nyngkong iaka jar da ioh biang ko thap sa kawi chwa u kut ka kylla step katwa ka Eastern FC won ym ye ko u thap katwa pyrchang ko.
Ha ka kylla miet ka Eastern FC da ioh ko u pynkhih chwa ia ka jar, tangwa ka Bornly FC da pynyoo biang ko ia i bor ko deiwa pyntam biang sa le tylli ki kol deiwa pynrem ia ka Eastern FC da 5-1.
Ka khusnam iong uni u snem man ko kawa heh bha, kiwa jop da ioh ki 2 lak 30 hajar tyngka katwa iaka kynhun wa chahrem won da iok ko 1 lak 20 hajar tyngka. Da sam khusnam leh cha u Rumi Laloo uwa ioh ia i nam ‘Best Player’ naka Bornly FC.
Ia kani ka ialehkai da wan pynhap pyrda da u Sniawbhalang Dhar, MLA ka thain uwa man leh kam u kongsan, deiwa emlang u ma Justine Dkhar, MLA ka Khliehriat Constituency, ma Robinus Syngkon, MLA ka Mookaiaw Constituency, u ma Paul Synnah SDO Electrical PHE Jowai Division, ma DM Wahlang Additional Deputy Commisioner West Jaintia Hills, U MDC ka thain u ma Hermon Phawa wa kiwi kiwi de kiwa chah khut sniawbha.
U kongsan u ma Sniawbhalang ha i klam iong oo da kyntu u iaki nongialehke hawa ialehke toh u em i mynsien maya ymtoh u iachoon uwi ia uwi, da e mynsien u leh wa kam kitæ kiwa em ia ka sap ha ka ialehke phutbol toh u nang pynbha pynmiat chooh chooh ia i sap iong ki palat ia iwa em ki katni neibhah ka kynjetbol leh man ko kawi na ka kharkhana kawa ekam ejam ia ki bru.
Kiwi won wa e ia i klam kynthup ia u ma Justine Dkhar, ma Robinus Syngkon, ma Hermon Phawa wa kiwi kiwi.
Discussion about this post