Ka HUCC da yoh ko yei naam jop ha ka lympung yalehke Under 15 Boys T20 Tournament 2022 wa da pynlai da ka All Jaiñtia Cricket Association (AJCA) ha madan Jrisaleiñ ynne ka sngi.
Ha ka yakhun wa nyngkong ynne ka sngi hapyrdi ka HUCC waka Ummulong Sports Club heipor 11:00 waje i step, ka HUCC da ye ko u pynrem ya ka Ummulong Sports Club da 78 Run.
Ya ka kylla khlem da jop da ka Ummulong wei da jied ko wow kawang bol nyngkong, neiliang ka HUCC kawa Bat nyngkong da yoh ko 136 Run na ki 20 Over wei da dooh noh ko 6 Wicket, ka Ummulong hawa kdong ya ka thong da ye ko u kamai du 58 Run na ki 14 Over wei da haap lut ki Wicket waroh.
Ya i naam Man of the Match da yoh da u Maremdor Sutnga yong ka HUCC deiwa yoh u 50 Run wa 3 Wicket na 3 Over wei ya ini i naam da ekti da u Daniel Dann uwa man kam u kongsan ha kani ka sngi.
