Deiwa yoh 89 Point, ka Sham Sham Secondary School da yoh ko yei naam Overall Champion Team ha ka East Jaiñtia Hills District Level Inter School Athletics Meet 2026 kawa dapoi cha wakut ynne ka sngi ha Teilang Playground, Dkhiah West, East Jaiñtia Hills District.
Ya ka yalang pynhaap pyrda da wan wow sakhi da u Deputy Commissioner ka District, u Manish Kumar kam u kongsan deiwa emlang ka District Sports Officer (DSO), East Jaiñtia Hills District, ka Stephanie M Rapsang, u Principal ka Jaintia Eastern College, u Dr. P. Nongtdu, ki khynnah skur, kiwa sikai skur wa ki dkhot ki Sports Association.
Deiwa yabhah da ki Group, ka KB Memorial Higher Secondary School da jop ko ya ka Under-14 Boys & Girls katwa ka Sham Sham Secondary School da jop ko ha ka Under-16 Boys & Girls.
Ka Wapung Higher Secondary School da jop ko ha ka Under-18 Boys katwa ka San Shnong Secondary School da jop ko ha ka Under-18 Girls.
Deiwa kheiñlang waroh, ka Sham Sham Secondary School da yoh ko yei naam Overall Champion ha uniu snem.
Yei naam Best Athlete da jop da u Ready Ryngkhlem na Wapung Higher Secondary School ha ka Under-14 katwa ka Lamsaka Dkhar na Sham Sham Secondary School da yoh ko yei naam Best Female Athlete ha ka Under-14.
Ha ka Under-16, u Highbornson Muksor na Khliehriat Presbyterian Secondary School da yoh u yei naam Best Male Athlete katwa ka Sandiya Dkhar na Sham Sham Secondary School da yoh ko yei naam Best Female Athlete.
Ha ka Under-18 won, u Lastduh Lamurong na Don Bosco College da yoh u yei Best Male Athlete katwa ka Rosy Sana na San Shnong Secondary School, Mukhaialong da yoh ko yei naam Best Female Athlete.
Kini kiwa jop daw mihkhmat ki ya ka East Jaiñtia Hills District ha ka State Level Inter School Athletics Meet kawa daw pynman ym slem de.
Discussion about this post