Ka South Garo Hills da ye ko wow kdong yei booh thong ka Shillong Cricket Association yow jop ya ka Final ka U-19 Women’s Cricket Tournament wa pynman da ka Meghalaya Cricket Association da 4 Wicket ha Williamnagar, East Garo Hills ynne ka sngi.
Ka Shillong da jop ko yaka kylla khlem wei da jied ko wow Bat nyngkong. Ka Jayshree Singh da kamai boon dooh ko deiwa yoh 35 Run katwa ka Suriti K Ray waka Neelam Roy waroh ar da yoh ki mar 22 Run samen. Tangwa ka Shillong da dooh ko ya ki 7 Wicket wa sah deiwa yoh du 20 Run iwa da pynpoi waroh 136 na ki 29.5 Over.
Ki le ngut kiwa kawang bol ka SGH da yoh ki mar le Wicket samen kitæ ka Jaylynn R Marak (3/16), ka Dianchidora (3/18) waka Smillin N Sangma (3/27) katwa ka Marme M Sangma da yoh ko (1/32).
Ka SGH da rap kop-kop ko hawa sdang yei beh thong deiwa dooh 2 Wicket deiwa kamai 18 Run tangwa da sdang wow skem deiwa wan ka Kim D Shira (19) waka Smillin (10). Ka Marme (29) waka Jaylynn (29 Not Out) da ye ki wow kamai chi Run chi bol yow pynlait ya ka SGH nei maa heiwa ka Jaylynn da neh ko hadooh wa ye u pynjop deiwa emlang ka Bandana Rai (7 Not Out) kiwa da kamai lang 47 Run neibynta ka Wicket wa ynñiaw.
Kiwa kawang bol ka Shillong da yaleh ki katwa ye yow ksoh ya kiwa Bat ka SGH heiwa ka Natasha Rabha (2/28), Suriti (2/32), Jayshree (1/23) waka Neelam (1/25) toh kiwa da yoh Wicket.
Ka Jaylynn deiwa lehbha daka Bat waka bol da yoh ko yei naam Player-of-the-match. Katwa ka Smillin won da yoh ko yei naam Player-of-the-tournament deiwa yoh waroh 17 tylli ki Wicket iwa da man awjan ar chah ya kawa yoh wa ar.
Ya kani ka Final da wan wow sakhilang da u East Garo Hills Deputy Commissioner, u Swapnil Tembe, u MCA Honorary Secretary, u Gideon Kharkongor wa kiwi de ki dkhot ka MCA deilang wa ki District Unit ka MCA.
