15 49.0138 8.38624 1 0 4000 1 https://wyrta.com 300 0

Jop u Dasajeki Rymbai yei naam Paila Ksiar waka Daffisa Pakynteiñ yei naam Lasubon Ksiar 2019

0 Comments

Jowai: Kam chibynta wow pynmih poisa neibynta wow pynmiat pynbha yaka Crèche waka Play School, ka Women’s Welfare Organisation Seiñraij Jowai, ha kani ka 20 tarik uni u bnai da pynman ko yei yakob bha chynrang watip kam u Paila Ksiar waka yakob miat kynthai watip kam ka Lasubon Ksiar ha Yungwalieh ka Loomiongkjam, Jowai.

I pynman ya kani ka yakob man haroh ko wow pynku yei sap ki khynroo khyllood, kamjooh leh u pynneh pynsah ya i riam tynre waka riti dustur.

Chwa u sdang yaka yakob da em ka yalang wa tbian wa pynlai daka Hima Lakiang, Chairperson ka Women’s Welfare Organisation hei emlang u Lakhon Dkhar MDC Sohmynting Khliehtyrchi kam u kongsan, u Dolloi ka Elaka Jowai u Puramon Kynjing, u President ka Seinraij Jowai u O.R. Challam, u General Secretary u A. Sumer wa kiwi kiwi nalor ki paidbah wa boon wa wan sakhi.

Yei yakob ha kani ka sngi da pynman haka le kylla wa da chimbynta da palat 30 ngut ki khynroo khyllood. Ka kylla kawa nyngkong toh i riam yong rim wa tysbah lang wa i thymme, ka kylla wa ar won i chaad katkam i rukom im yong i, katwa ka kylla wa le won i riam trynre wa i kylli ya ki phang kylli. 

Hadien ka kylla wa khadooh heiwa da yoh yei kylli na kiwa bichaar kamjooh i jubab na kiwa chimbynta da pynbna ya kiwa jop ha kani ka yakob heiwa yei naam U Paila Ksiar da rah da u Dasajeki Rymbai uwa na Tpep Pale Jowai, uwa da pyndep u yei puræ Claas XII wei dang puræ u katni ha ITI Rynjah, Shillong, da wan wa ar u Ailut Lyngdoh uwa naka chnong Sohkymphor wei dang puræ Class XII u ha Kiang Nangbah Higher Secondary, wa le won u Marbiang Challam na Loomiongkjam, Jowai uwa da pyndep yaka kyrdan Class XII.

Yei nam Ka Lasubon Ksiar won da rah da ka Daffisa Pakynteiñ kawa na Loomiongkjam, Jowai, kawa dang puræ MSC 1st Semester ha NEHU, da wan wa ar ka Salina Najiar wa na Loompyrdi Iongpiah, Jowai kawa dang puræ B.Sc 1st Semester, wa le won ka Sima Lamin kawa na Dulong, Jowai kawa dang puræ BA 5th Semester ha Kiang Nangbah Govt. College Jowai.

U Dasajeki Rymbai nalor wada rah u yei naam kam U Paila Ksiar da rah haroh u yei naam kam u khynroo wa biang i rynyieñ, katwa ka Sima Lamin nalor wada rah ko yei naam wa le ka Lasubon Ksiar da rah haroh ko yei naam rben wei jrong sñiooh.

Ya kini kiwa jop da sam deilang ka song poisa wa T. 23,000 cha kiwa yoh nyngkong, kiwa wan wa ar T. 18,000, katwa ya kiwa wan wa le won T. 15,000, nalor wa saam haroh ya ki e sñiawbha cha waroh kiwa chimbynta.

Da pynchongchit chooh chooh ya kani ka sngi da ki chaad ki rwai wa da chimbynta da ki khon ka Seiñraij Jowai wa kiwi kiwi.

Also Read: Jop u Wansa-oo-Dhar ia i nam Paila Ksiar wa ka Tracemon Dkhar kam ka Lasubon Ksiar 2015

0 Comments

Leave a Reply