Uwa yahkhmat ya ka TMC Legislature Party, u Dr. Mukul Sangma wa kiwi ki MLA ynne ka sngi da lai e jubab ki ya u Assembly Secretariat hajrong ka ujor wa e da ka Congress yow dawa pyndam MLA noh ki katkam ki kyndon ka 10th Schedule.
Kam wow pynkynmoo wa kawa yahkhmat ka Congress Legislature Party, ka Ampareen Lyngdoh da yakhun pyrchah ko ya ini i leh kini ki 12 ngut ki MLA ka Party kiwa yut cha ka TMC deiwa kdaw ya kiwa boon ki kyndon wa tyngkheiñ ki hapoh ka 10th Schedule wa Rule 6 ka aiñ The Members of Meghalaya Legislative Assembly (Disqualification on ground of defection) Rules, 1988.
U Dr. Mukul Sangma da ong u wa ka Para 4 (1) ka 10th Schedule da chah ko wow lai pynyabi kawi ka Party wa kawi won wei ka Para 4 (2) da kdaw che ko wa ym toh won u duna 2 bhah na 3 bhah ki dkhot ka Legislature Party kiwa lai man dkhot wa kawi won ka Party wei yeini da leh ki katkam wa emkaam.
Uwa yahkhmat ka TMC da ong u wa kani ka ujor ka Congress toh ka wym em iyi iyi leh tangwa du wow sdang ki parom wa bakla wei wow pynthut ya ki 12 ngut wow kaap noh ki cha chilliang.
“Ka ujor da ong ko wa ym em biang paaid wei ini toh iwa bakla neibhah na ki 17 ngut, ki 12 ngut da man ki 2 bhah na ka 3 bhah katwa ka Congress kwah bait wow yah bakla yeini,” da ong u Dr. Sangma.
U Mukul da ong u leh wa nyngkong da ujor pyrchah 10 ngut donhi yow pynoo wa duna paaid deiwa ieh ya u Charles Pyngrope wa u Shitlang Pale hanla da dep ki wow psiah lang waroh 12 ngut.
“Ini toh du wow pynyoo rong paidbah donhi yow pyrchang wow pynsñiawthooh bakla yow thut kiwi wow psiah cha ka TMC,” ong u Dr. Sangma.
Da ong u leh wa ini i wym em ujor ya u Charles Pyngrope wa u Shitlang Pale toh iwa phylla bha neibhah ki leh da yut lang ki, boi ini toh i buit wow pynkulmar ya kini.
Da ong u leh wa ini toh iwa pynemkaam bakla ya ka aiñ wei da pynsepai leh ya ka aiñ deiwa leh ya kam kini ki jait.
