theme-sticky-logo-alt
theme-logo-alt
Advertisement ad1

Ka aiñ yada masi yong ka Assam man ko pyrchah ya ka riti synchaar ka ri, phah tuklar ka HYC

Advertisement ad1
Advertisement ad1

Ka Hynniewrep Youth’s Council (HYC) ynne ka sngi da phah ko wow tuklar smat ka sorkar jylla hajrong i wanrah yong ka sorkar Assam ya ka Cattle Preservation Bill, 2021, neibhah katai ka Bill daw ktah ko chiboon ya ka jylla Meghalaya kawa dang chaniah ha kiwi ki jylla wow yoh baam doh.

U President ka HYC, u Robertjune Kharjahrin da ong u wa ka Section 7 yong katai ka Bill daw ktah bha ko ya ka jylla, neibhah da ong ko wa lada em i chalan ya ka masi na kawi ka jylla cha kawi, hap wow paan bor na ka jylla Assam, wei kawi ka kyndon da ong ko wa ka sorkar Assam ym chah ko wow dai ya ki masi næ mooid cha ki jylla lada ym em ki ya ki aiñ yada masi.

Advertisement ad1

Da ong u wa ka Section 7 ha katai ka Bill man ko pyrchah ya ka aiñ wa ya ka riti synchaar ka ri India, neibhah katkam ka 7th Schedule, ka Interstate Trade and Commerce toh ka phang yong ka sorkar pyrdi wei ym ye wow chna aiñ da kawon kawon ka sorkar jylla.

Da ong u leh wa ha ka khayi ym emkaam wow paan bor, wei lada ka Assam ong ko wa hap u paan bor neibynta wow pynpoi ya ki mar, ka jylla Meghalaya ye ko u leh ya i jooh ya ki mar wa kit na Assam kiwa lai lyngba na ka jylla Meghalaya, deiwa pynrap wa ka sorkar Assam da i thmu wow pynsñiawbha ya ki paaid Hindu daw ktah won ko ya i bor wa ka iktiar yong ka sorkar Meghalaya.

U President ka HYC da ong u leh wa neidaw wa kani ka Bill toh kawa ktah leh ya ka khayi pateiñ yong kiwi ki jylla, ym toh wow man aiñ ko du deiwa mynjur u Lat ka Assam, tangwa emkaam leh ya ka muhor na u President ka ri India uwa embor wow paan leh yei sñiaw yong kiwi ki jylla.

Ka HYC ynnne ka sngi da pynsñiaw ko ya ini i chah ktah ka jylla lada pynman aiñ ka Assam ya ka CPB hakhmat u Symbood Montri Rangbah ka jylla, u Prestone Tynsong uwa da kular wow chimkhia ya ini waka sorkar Assam.

U Robert da ong u leh wa kani ka Bill lada man aiñ ko daw ktah ko leh yei kamai yong kiwa chong chnong ka jylla kiwa kreh ya ki kaam chohdoh wei khayi masi.

Ha iwi i liang da ong u wa ka jylla hap ko wow pyrkhat leh kammon wow pyndap da idæ yei emkaam doh neibhah ym ye wow chaniah sah ha kiwi ki jylla, da pyntip u leh wa ka seiñ da e yumut hakhmat u Prestone uwa man leh u Montri ka chnat Animal Husbandry & Veterinary wow wanrah ki laad yarap ya kiwa chong chnong ka jylla kam wow pynchlur ya ki ha ki kaam wow psan mrad.

Share this:
Previous

Yarap niaam rong u Conrad ya i yung wa chna hapoh ka Scheme PMAY

Next

Dawa ka HYC wow riñ Video heipor Interview wei wow pynbna Result hapoh 24 kynta