Em uwi u tymmen wa chong wa sah samen. Kwah u, u pooh yei kpær i hali yong oo, tangwa ym nang u toh da tymmen u. Em u, u wi heh u khon u, tang wa u khon yong oo leh, em u hapoh patok.
Kamtæ, dakut ki laad u tymmen, heitæ da thoh u da ka chithi cha u khon yong oo chapoh patok. Haka chithi thoh u kamni nae :
“Khon wa maya,
Hadooh katwon sniawsih i mynsien O u thoh kani ka chithi cha me, tangwa u leh O kammon ym yohsa haap O u khana yei eh yong nga han lym ye mi u yarap ya nga leh. Khon, mut O u ong ya me wa, ym em sniaw chait bha O, seiwi won leh da tymmen O, tæ kwah O u thung jhoor thung salah ha kpær, tangwa ym nang de o u pooh. U ieh chrah aki ini i kpær leh, ym suk mynsien O, watoh heipor dang em ka bei mi, jooh thung jooh rep ka ki, neitæ i daw ym suk nood O u ieh. Katwa da tymmen O kamni, mut O’u rah yow wakhu leh ym ye de O.
Tip hi O, madei em da me heini, waroh ini i jynjar, da lait lut aki. Tip hi O leh, me hi u pooh madei dam mi u chah kset.
Na u
Pa wa maya yong me.
Hadien kattu katni sngi, man da dep phah utae u tymmen, kammon ræ kammon yoo u ha kot khubor wa phah kylla u khon u. Thoh u khon u kamni nae;
Pa wa maya,
Hadooh katwon wa kmen O u purae ya ka chithi yong me, tangwa pa wa maya, neibynta yong nga, pa, ham pooh ki itu i kpær, watoh hapoh kpær da thlep aka katu ka suloi!!!!
Na u
Khon wa dakaid yong me.
Katwa kamtæ, kam mynstep, chi dorjon ki pulit wa wan ha kpær utæ u tymmen, wa ya thooh ki ka, katæ ka suloi. Heitæ pyrchang u tymmen u khang tangwa ym ye u. Ki pulit haap tih ki yei kpær yow chem ki ka. Tangwa ha waroh i kpær, ym chem ki yiyi leh.
U tae u tymmen phylla u jlang næ, tae thoh biang u cha u khon u,
“Khon, nei bynta yong me, pyrchang O u yada ya me, dei wa khang tangwa ym ap ki nga, tangwa kattæ leh embhah wa ym em chem ki ka, katae ka suloi wa thlep mi”.
Hadien da purae u khon ka, heitæ jubab biang u cha u pa u,
“Pa, thung kattu ki salah ki jhoor mi, ini heh i kaam wa khian wa ye O u leh ya me…”
Khyrngait u tymmen!!!
I sneiñ : Ym phær lada em phi heiwon heiwon leh, lada kwah phi u leh nadooh mynsien yong phi, ye hi phi hanlada ha patok leh. I pyrkhat iwa tam, ymtoh wa jngai phi næ ym em phi ha
yung.
Discussion about this post