Ka Chaad Sukra 2025 yong ka Seiñraij Jowai wa jooh pynman khlieh u snem chwa wow hiar rep, hiar riang neibynta wow e ngooh e dem ya ka bei rymaw kawa psa wa pyndap pynbiang yei emkaam wa boonjait u bru ha sla pyrthai wa kynthup leh nadooh i baam wa bam man-ka-sngi. Ha uni u snem leh daw pynman biang ka ha ka 6 tarik u bnai April.
Ka phang yong uni u snem toh kawa ong “Ah Bei Ah Bei Rymaw, Yi cha Bei ka Nongkylliang”.
Heiyatoh wa kani ka Chaad Sukra neiliang kiwa yahkhmat ka Seiñraij wa kynthup ya u President, u Hercules Toi, u General Secretary, u Arwotki Sumer wa Assistant Secretary, u Wyraiki Kharbuki hawa klam wa kiwa thoh khubor ynne ka sngi da pyntip paidbah ki leh wa ya ka Chaad Sukra wa jooh pynman ha Mynkoi Pyrdi Iongpiah man-u-snem chwa ka chaad mih yaaw, da rah noh cha Madan Ryngkaw kawa em ha Tpep Pale.
I daw wa rah cha Madan Ryngkaw toh yow suk kiwa chimbynta kamjooh kiwa wan paitke, neidaw wa heh ka madan wei biang ki thaw chong.
I chaad ha ka 6 tarik u sdang ko nadooh i por 10:00 waje i step ha Madan Ryngkaw da 17 tylli ki chaad, manda mih yaaw won manda poi ha Biar ka Blai daw em 3 tylli ki chaad, neitæ won ha Iawmusiang daw em 14 tylli ki chaad.
Da pyntip leh wa daw wan chimbynta kiwa chaad na Shangpung wa na ka Seng Khasi Mawsynram.
Ki kongsan wa daw wan sakhi ha ka sngi Chaad Sukra kynthup ki ya u Prestone Tynsong, Dy. CM ka sorkar jylla wa u MLA ka Jowai, u Wailadmiki Shylla uwa man leh u Chairman ka MUDA.
Kamtæ neiliang ka Seiñraij da khut sñiawbha ko ya waroh ki khon ka Niamtre kamjooh kiwa em ha kiwi tawon ki jait niam wow wan sakhilang ya kani ka chaad, neibhah wa man ka chaad wa nang chongchit na u snem cha u snem.
Chooh chooh da pyntip ki leh wa ha ka miet ka 5 tarik daw em ka lehke Drama wa pyrtuid “Thij Chwa” wa da pynkhreh u pynman heipor 5:00 waje i janmiet ha Yungwalieh ka Iongpiah.
Discussion about this post