Shillong: U MLA ka Congress na Mawlai Constituency, u Process T Sawkmie da ong u wa ka Congress hapoh ka jylla hun ko wow em ha ka liang pyrchah kawa khlan, deiwa ong leh wa ka khubor wa ka Congress thmu ko wow khroh ya ka National Peoples’ Party (NPP) wow chna sorkar lang ha Meghalaya toh du ki khubor hamsaya donhi.
Hawa yaklam wa kiwa pathai khubor ynne, da ong u wa mih ki khubor wow chna sorkar ka Congress wa ka NPP hapoh Meghalaya toh iwa ha la-ær wa i khubor hamsaya donhi, da ong u wa iwa sakhiat hi toh wa ka sorkar MDA wa yah da ka NPP em ko hadooh 41 ngut ki MLA kiwa kyrchaan wei man ko kawa skem, katwa ka Congress em ko du 19 ngut kiwa kwah wow kreh du kam ki MLA kiwa em i kitkhlieh, ong u leh wa i em ha ka liang pyrchah emkaam wow man ko kawa khlan wow tei ya ka jylla.
Chooh chooh da ong wa neiliang ka Congress katni phah thooh ko yaki bru wa pynpoor ya ki khubor hamsaya wa yaklam ka Congress waka NPP wow chna yaka sorkar.
U Sawkmie da ong u leh, kamwa man katni ka Congress ym kwah ko wow yakreh wa kawon kawon ka Party, tangwa hei sakhiat toh wa ki 19 ngut ki MLA ka Party kreh ki wa ka sorkar MDA wow yakhun pyrchah ya ka khlam COVID-19, neibhah kam kiwa mihkhmat i chait i khiah ki paidbah toh iwa hakhmat katwa ka Politics won wan ko hadien.
Ka Congress embynta ko wow leh Politics: Hek
U Montri hapoh ka sorkar Meghalaya Democratic Alliance (MDA) uwa man leh u MLA ka BJP, u Alexander Laoo Hek da ong u wa waroh ki seiñ saiñpyrthai em ki jar jiar ki rukom krehkaam wei da i bynta wow leh Politics, wei wa ka Congress leh pyrchang ko ya ki buit yong ka ha ka saiñpyrthai.
U Montri da ong u wa ya ini hawa kylli hadien wa mih khubor wa ka Congress yaklam ko wa ka NPP wow chna ya ka sorkar hapoh ka jylla, tangwa da pynsñiaw u wa ha ka MDA waroh ki seiñ saiñpyrthai ki yatylli, wei ym em iwon iwon i khih ka sorkar.
