Jowai: Chibynta wow thooh ki luti kammon wow pynku ya ka yarong poisa ka Jaiñtia Hills Autonomous District Council (JHADC), neiliang u Executive Member uwa pait ya ka chnat Taxation, u Winning G Sungoh ha ka yalang wa khut u ya ki waheh shnong ha kamra krehkaam yong oo ynne ka sngi, da kyrpaad u yei krehlang ki waheh chnong heiyatoh wa kiwa khayi wa wan na baar neibhah wa katkam ka aiñ ka JHADC, da ong u wa kiwon kiwon ki baar jylla wa wan seiñ khih lada ki Retailer namo Wholesaler leh emkaam wow yoh ki ya ka Trading License na ka Council.
Da pyntip u wa ha ki sngi wa dadep leh neiliang ki wakreh namo ki Enforcement da pyrchang ki wow lai kynreh kot tangwa wa duna ki wakreh ha ka chnat Taxation ymtoh iwa suk wow lai chadooh ki kdong ki chmiang, kamtæ ki waheh chnong toh ki bru ka Council wei kiwa tip rap bha, kamtæ da ebor ha ki wow yarap chim yukheiñ ya i em ki baar jylla ha ki chnong yong ki wei wow pyntip leh cha ka Council wa lada em namo ym em ki ya ka Non Tribal Service License kamwa toh u yoh na ka council.
Heiyatoh wa ka Professional Tax won da ong u wa ym du ki wakreh na baar jylla toh u su ki tangwa wot ki tre jylla emkaam ki wow su neibhah wa katkam ka aiñ ka Council uwon uwon uwa chong chnong wa haap hapoh u pood ka Council uwa kamai palat 50 hajar emkaam wow yoh ya ka Professional Tax na ka Council katkam ki dor waphær waphær wei ka chong katkam ki jait kreh wa leh u.
Hajrong ini kada waroh kiwa chong chnong nadooh East wa West Jaiñtia krehlang ki wow su ya ka Professional Tax nadooh ki wakreh sorkar, kiwa krehkaam yong ki hi wa kiwi, kyrmen ki wa ini i pyrchang daw yarap ko chiboon ya ka yarong poisa ka Council, da pynrap u Winning.
Chooh chooh da ong u wa kam u Executive Member hadien wa chimkti u ya kani ka chnat da pait u ya ki Record wei da chem u wa waroh chi kattu i dooh nong ka Council ymtoh de iwa ke.
Da kyntu u leh ya ki waheh chnong wow pait bniah ya ki dukan Benami kiwa kam tre da ki tre jylla neibhah ini da pyndoohnong bha i ya ka Council wei lada chem ya ki wow sñiawbha pyntip cha ka Council neibynta wow leh yeiwa emkaam.
Da ong u wa kani ka rai u krehkaam ko ha waroh u pood ka Council wei ha ka yalang ynne ka sngi da khut chwa u du ya ki waheh chnong ka Jowai khamtam kiwa haap hapoh ki bynta em ki dukan yaw namo ki Commercial Area.
Neidaw i long i man ka pyrthai ymye wow khut lang ya kiwi won ki waheh chnong wa haap hapoh ki Commercial Area tangwa da ong u wa ya kani ka rai daw pyntip lang cha kiwi won ki waheh chnong.