Shillong: Ka Bharatya Janata Party da pynbaad ko wa ka sorkar MUA-II wa yahkhmat da ka Congress ha kani ka jylla da dap ko du ki kaam baam-tooh wei da toh por wa ki paidbah u kyntait noh ki ka ha kani ka election wow wan.
U President ka BJP Meghalaya u Shibun Lyngdoh hawa yaklam wa kiwa pathai khubor ha ka yalap pyrchah baam-tooh wa pynman da ka BJYM ynne ka sngi, da ong u wa ka BJP kwah ko wa ka sorkar toh u man ko ka yong ki paidbah, tangwa kani ka sorkar kawa katni dap ko du ki kaam baam-tooh, lada ha ka tnat puræ puthi, ka tnat bordiñ, ka tnat i chait i khiah, wa kiwi kiwi kiwa pynhiar ya i roi i paar.
U Shibun da ong u wa i kam yong u Montri Rangbah ka jylla u Dr. Mukul Sangma wa ka roi ka paar em hi ko ha ka jylla, emkaam wow pynche u wa kam kiyi kitæ ki kaam pynroi wa em hapoh ka jylla.
Heiwi i liang, u President ka BJYM Meghalaya, u Egenstar Kurkalang da ong u wa i daw wa pynman ya kani yalang toh wow pynyoo yei pyrchah wa joor yei roi ki kaam baam-tooh wa ya i synchaar lehbor u Dr. Mukul Sangma ha ka jylla hadooh wa da kheiñ jhep ya ki paidbah, ki sahep wa ki montri yong oo.
Da ong u wa u Dr. Mukul da hukum u ya ki montri sorkar, ki sahep wow leh ki katwa sñiaw wa ngait u wei ki khynroo khyllood wa thooh khih thooh kreh leh ym yohlaad ki neibhah wa da chah knieh i hok yong ki.
Chooh chooh da ong u wa i puræ puthi leh da hiar i chawa palat heiwa da ki hajar ngut ki wym yoh admission ha ki thaw puræ ka jylla la ha Jowai, Nongstoin, Shillong, ha Tura wa kiwi ki thaw.
Da pynbaad u wa neidaw wa ka sorkar ym chimkhia ko yei kaam baam-tooh, ki kaam sialieh dang sah ko hadooh katni, ka bai baam ki khynnah, ka yung dorbar chna aiñ wa kiwi kiwi.
Da pynkut u deiwa ong wa ka jylla ym emkaam de ko ya kiwa yahkhmat baam-tooh tangwa emkaam ya kiwa khooid kiwa pait yaki paidbah wa u Dr Mukul da toh wow hiar chuki noh u yow elaad ya kiwi wow synchaar.
Discussion about this post