Ka Hynniewtrep Youth Council (HYC) da khut da wer ko ya ki paidbah wa chong chnong ka jylla wow wan cha ka yalang wa ka Rally yow toor cha Secretariat haka 8 tarik u Khongchonglad (Nov) 2024.
Ini i khut paidbah ka HYC wow toor cha Secretariat toh neibynta wow dawa naka sorkar jylla wow pynkrehkaam ya ki 7 tylli ki phang wow yakhun pyrchah yei roi kiwa khayi wa kiwa dih drugs hapoh Meghalaya khamtam ha nongbah Shillong.
Ki 7 tylli ki phang wa ka HYC da phah ko cha u Montri Rangbah ka jylla wow yakhun pyrchah yei roi kiwa khayi wa kiwa dih drugs hapoh Meghalaya toh yow booh ya ki thaw sumaar (Rehabilitation Centre), ka Free Detoxification (OST) wa Day Care Center ha ki thaw wa roi i drugs, wow booh da ki Fast Track Courts/Special Courts hapoh ka NDPS Act, wow takit wei pynrem ya ki mukotduma hapoh ka aiñ NDPS Act 1985, wow kdoh u khoom yei khayi drugs hapoh ka Narcotic Drugs and Psychotropic Substances Act, 1988 (PIT-NDPS Act), wow pynkhlan ya ki laad ki luti wow khang yei wan psiah i drugs chapoh ka jylla wei wow wanrah daka Office yong ka chnat Narcotics Control Bureau (NCB) ha Shillong.
Hawa klam cha ki laad pathai khubor, u President ka HYC, u Roy Kupar Synrem da kam u wa kini ki mat dawa ka seiñ kiwa da em chwa hapoh ka Drug Reduction Elimination and Action Mission (DREAM) kawa da pynbna ka sorkar nadooh u 2023 tangwa hadooh katni won i pynkrehkaam ym mih pythai i.
U Roykupar da kynthah u leh yeiwa kam yong ka sorkar jylla wa da pynkrehkaam ya ka DREAM hapoh ka jylla tangwa da ma ko kam i yimphoo (Dream) neibhah hadooh katni ym pu em mih madan ki.
Da ong u wa ka sorkar toh u sñiawthooh che ko wa ka thma pyrchah yei drugs ymtoh ka thma du yong ka HYC tangwa toh yong waroh ki paidbah ka jylla kiwa em i sñiawkhia yei bha i miat yong ka imlang sahlang.
“Na ini i daw, ka HYC paan ko yei kyrchaan na ki paidbah ka jylla wow ya ksohkti lang waka seiñ ha kani ka thma pyrchah yei drugs yow pyndooh jait deiwa kynjroi na tre na thied hapoh ka jylla khamtam na Shillong,” da ong u Roykupar.
U President ka HYC da pyntip u wa ka seiñ hachwa wow chim ko ki laad ki luti da kiwa khor yow pynbor ya ka sorkar jylla wow pynkrehkaam pura ya ki kyndon yong ka DREAM Porject yow pyndooh jait yei drugs, daw pynman chwa da ki yalang paidbah ha waroh ki nongbah yong ki District hapoh Ri-loom Khasi-Jaiñtia.
Ka HYC da rai ko wow pynman chwa da ka yalang paidbah haka 25 tarik uni u bani ha Yaaw Umsning, ha Nongstoin haka 28 tarik, ha ka 29 tarik ha Nongpoh, ha ka 30 tarik ha Iawmusiang, Jowai, ha ka 31 tarik ha Yaaw Mawkyrwat, ha ka 1 tarik u Khongchonglad ha Khliehriat, 2 tarik ha Mairang wa kiwi ki yalang ha kylleiñ ki chnong ka nongbah Shillong kam ha Mawlai, Upper Shillong, Mawprem, Rynjah wa ha Mawryngkneng.
“Hadien kini ki yalang ha ki nongbah District, ka HYC daw pynman ko leh da ka Rally wa heh ha ka 8 tarik u Khonchonglad 2024 ha Shillong yow toor cha Secretariat kawa man ka yung krehkaam ki paidbah neibhah ki bru kiwa chong ha Secretariat toh kiwa da jied da ki paidbah,” da ong u President ka HYC.
Discussion about this post