Ka ILP toh ka aiñ wa khlan dooh wow yada nei wan psiah kiwa na baar chapoh ka jylla: PT Sawkmie

Shillong: Hawa chimbynta lang haka yatai nia hei yatoh wa ka maitphang u Lat ka jylla ha yung dorbar chna aiñ, neiliang u MLA ka Congress na Mawlai u Process T Sawkmie da pynsñiaw u heiyatoh wa i klam u Lat, u Sawkmie da ong u wa da ieh u Lat ya kiwa boon ki phang kiwa ktah wei wa emkaam hapoh ka jylla.

Kini ki phang wa da wanrah da u MLA ka Mawlai kynthup ki ya i sñiaw chngaiñ ki kynthai wa ki khynnah, i wym yoh kaam yoh jam, i pyllait ya i khang tih mooyong ha ka jylla, i duna ka umbaam, i emkaam ki surok kiwa bha, ka Policy neibynta ka puræ puthi, i eh ki khoo ki warep, i yoh psiah pahooh ki bru wa wan na baar jylla nalor kiwi kiwi de.

U Sawkmie da pynsñiaw u leh wa ka Inner Line Permit (ILP) man ko ka laad kawa biang dooh wow khang yei wan psiah ki bru wa wan na baar cha kani ka jylla.

Da ong u wa napyrdi ki 18 lak ngut tam kiwa thap Vote katwon ngut kiwa toh ki hok ki trei jylla wei ka ILP toh kawi na ki aiñ wa ye u khang laad yei psiah ki bru na baar yeiwa ka sorkar Congress warim wa yahkhmat da u Dr. Mukul Sangma da kyntait ko wow pdiang yei dawa ki seiñbhalang wow pynkrehkaam ya kani ka aiñ.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Hei yatoh won wow pyllait ya ka khang tih mooyong ha ka jylla, neiliang u MLA ka Congress da pynkynmoo u yei kular ka BJP wa du 6 bnai lada wan ko ha ka bor daw pyllait ko ya ini i eh i khoo kawa da pyndooh kam ya kiwa boon kiwa chong chnong ka jylla.

Ha iwi tawon i liang, da kynthah u leh ya ka sorkar NDA wa yahkhmat da ka BJP ha Delhi deiwa ong wa i wanrah da ka aiñ wow khrong dan thymme ka Goods and Services Tax (GST) da booh booh ko i eh ya ki paidbah khamtam ya ki Khasi, Jaiñtia wa Garo kiwa man ki ri-loom heiwa ki haap ki wow su dan heiwa toh u lait ki katkam ka aiñ ha ki por wa nachwa.