U montri ka kaam baar ri namo u Foreign Minister ka ri Iran, u Javad Zarif uwa em ha India da ong u wa ka India ye ko u leh chiboon ki kaam wow wanrah yei chongsuk ha ka thaaiñ Gulf.
Heiytoh wa i yakynaad hapyrdi ka Iran wa ka America ha kani ka tayaw wa dadep, ka India da kyntu ko ya waroh arliang wow poi biang hei suk wei da yaklam ko leh dei langær wa ka Iran, United Arab Emirates, Oman wa Qatar hajrong ini.
Da ong u wa ka India em ko i bor iwa khlan hapoh ka thaaiñ South Asia iwa ye wow wanrah chiboon ki kaam pynroi wa i chongsuk ha kani ka thaaiñ.
I khayi pateiñ lait na i phniang hapyrdi ka Iran wa India da kynjoh i palat $5 Billion ha u snem wa dadep.
Ka Iran man ko ka ri kawa le hei boon dooh i dai phniang ya ka India heiwa ka India da thied ko hadooh 12.5 million tonne i phniang na kani ka ri du hapyrdi u Naitung (April) 2017 hadooh u Naichiphaw (October) 2018.
Ka India, Iran, wa Afghanistan da soi ki leh ya ka soskular wow chah ya ki mar ka India wa chalan cha Central Asia wa Afghanistan wow kheiñkor ya ki wei wow pynduna ya i dor ka dan ya ki.
Ka sorkar India leh da kular ko hadooh $500 million wow chna pynmiat ya ka Chabahar Port, wow pynku ya i khayi pateiñ hapyrdi kini ki le ri.
Kam wow pynkynmoo heini i yatoh hapyrdi ka India wa ka Iran man i iwa khlan bha wei u Narendra Modi da lai u cha Iran ha u Naisan 2016, wei kamjooh leh u President ka Iran u Hassan Rouhani da wan u cha India ha u Thohlakhmi (February) 2018 wow pynkhlan ya ini i yatohlok kini ki ar ri.
Discussion about this post