Hadien wa mih biang i awri awra ha ki bynta khappood ka Block-I ha kini ki khajak sngi itæ toh neidaw wa wan pynyieñ Signboard ka Karbi Anglong Autonomous Council ha chnong Khanduli, i ya awri won heiyatoh wa ki thaw rep wa wan rep da ki jaitbru Karbi ha chnong Moojem najrong i chna sarok ka Assam na Khadkasla hadooh Umkhyrmi.
Ynne ka sngi ki ar District yong ki ar jylla wa kynthup ya ka West Karbi Anglong District yong ka jylla Assam wa West Jaiñtia Hills District yong ka jylla Meghalaya da yachem ki ha Conference Room ka yung krehkaam u DC ka West Jaiñtia Hills District ha Jowai neibynta u yaklam hajrong kammon u wanrah yei chongsuk ha ki thaaiñ khappood.
Neiliang ki bor District ka West Karbi Anglong da emlang ka Deputy Commissioner, ka Krishna Baruah, u SP, u Indranil Baruah deilang wa uwi u Asst Commisioner. Katwa neiliang ki bor District ka West Jaiñtia Hills won da em u Deputy Commissioner, u BS Sohliya, u SP, u S. Syrti, ka DSP, ka C. Lyngdoh, ki Magistrate, neitæ u Dy. CEM ka JHADC u Lasky Rymbai wa kiwi won ki MDC.
Hadien ka yalang da yoh u yaklam wa ka DC ka West Karbi Anglong, ka Krishna Baruah kawa da ban hajrong i emkaam u yoh yei yakrehlang ki paidbah wa chong ha ki thaaiñ khappood deilang wa ki bor District khnang yow dam u joor i kynaad hadien habood.
Da ong haroh ko wa neiliang ka Karbi Anglong Autonomous Council hawa leh ko yeiwon iwon i kaam pynroi wym jooh pyntip ko cha ki bor District wei ye u man neini i daw tæ mih i kulmar.
Heijoooh i por pynrap haroh ko wa daw phah yutip ki cha ki bor ka Autonomous Council wow pyntip ko yei yi wa mut ko u chna næ wanrah ki kaam pynroi khnang yow ye u pynneh yei chongsuk chong chngaaiñ.
Hawa kylli won lada ka chnong Khanduli haap ko ha Assam næ ha Meghalaya neibhah dang ha kini ki sngi ki bor ka Karbi Anglong Autonomous Council wan pynyeiñ Signboard khrong dan ko ha chnong Khanduli, da jubab ko deiwa ong katkam ka Map wa em ki, ka Khanduli haap ko hapoh u pood ang ka West Karbi Anglong District.
U Deputy Commissioner ka West Jaiñtia Hills District won ong u wa neiliang yong ki katwa ye u yaleh ki wow wanrah yei chongsuk chong chngaaiñ wei iyi wa jia ha Khanduli, ki bor District ka West Karbi Anglong daw yaklam ki yow pynyieñ noh ya ka Signboard cha kawi ka thaw wa hunlang ki paidbah.
Heiyatoh won wow pyntikna ya u pood u ang, waroh arngut kini ki DC yong ki ar District ong ki katwa katni da em ka Regional Committee ha ki ar District yong kini ki ar jylla yow pynbait pood, kani hi ka Committee wow pait wow bichaar chwa u chim ya ka rai.
