15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Ka lehkmen ‘Wildlife Week’ ha Ri-loom Jaiñtia

0 Comments

Jowai: Ka ophis ka Divisional Forest Officer, Jaintia Hills Wildlife Division da pynman ko ia ka ‘Awareness Programme on Wildlife Conservation’ ynnin ka sngi ha District Library Auditorium, Jowai deiwa chimwynta ki khynnah skur ha ka Debate, Quiz wa ka iakop Extempore Speech.  Kani toh chiwynta ka lehkmen ‘Wildlife Week’ kawa sdang nadooh ka 2 tarik hadooh ka 8 tarik uni u bnai kawa daw pynkut ha Umkiang.

Ha ka iakop quiz ha kani ka sngi da e ki jingkylli iow chem hadooh katwon tip ki nongchimbynta chaphang ka mariang wa ki jingim wa em hapooh iong ka. Boon ki jingkylli toh kiwa iatoh wa ka jylla Meghalaya kamjooh leh wa ka ri-loom Jaiñtia. Da booh ha kiwa chimwynta ha kawi ka kylla deiwa pynyoo ia ki dur ki mrad wa em hapooh ki distrik ka Jaiñtia kawa da pynlyngooh ia kiwa boon, ia i boon ki mrad wa ymjooh em wa yoo lane wa tip pyrtuit ia ki. Ha kani ka iakop quiz da wan chimwynta da 7 tylli ki skur ka chnong Jowai. Iaka nam jop da rah da ka North Liberty Higher Secondary School, Jowai kawa mih khmat da u Damanlangki Pale wa u Arlangki Kma. Ia ka nam wa ar do ioh da ka Khimusniang Presbyterian Sceondary School, Jowai kawa kynthup ia u Peaceful Dkhar wa u Lastborn Hua. Ia ka kyrdan wa le da ioh rah da ka Jowai Basic RMSA School, Jowai kawa mih khmat da u Sanglam Kungte wa u Phyrnai-Hi-Oo Bang.

Advertisement ad1

Ha ka iakop ‘Debate’ da ia tainia kiwa chimwynta ha ka phang ‘Is conserving wildlife necessary for our posterity’ kawa mut ‘Emkaam hi mo u pynneh pynsah ia ki mrad ia ki patein wa daw wan.’ Kani ka ia tainia da man ko kawa chongchit bha heiwa ki wa chimwynta da sai ki i buit i budai iong ki u kyrchan wa u pyrchah ia kani ka phang. Ha ka wakut da rah da ka Bymon Miralda Laloo na ka North Liberty Hisher Secondary School, Jowai kam ka nongiatai wa tbit dooh pynbood da ka Bianghun Kyndait na ka Government Boys’ Higher Secondary School, Jowai ia ka nam wa ar katwa ia ka nam wa le won da ioh da ka Elgiva Shylla na North Liberty Higher Secondary School, Jowai.

Ha ka iakop extempore Speech won ki khynnah skur do klam ki ha ki phang wa iatoh wa ka mariang heiwa ia i nam wa jop nyngkong da rah da ka Aidamon Talang, North Liberty Higher Secondary School, Jowai, wa ar da ioh da u Patrick Synnah uwa na ka jooh hi ka skur North Liberty Higher Secondary School, Jowai pynbood da ka Establin Nongsiej na ka Janitia Secondary School, Jowai.

Ka kong H. Lato, MFS DFO Jaintia Hills Wildlife Divios, Jowai ha i klam iong ka ha khmat ki khynnah skur da pynkynmoo ko ia ki; ia i emkam u sumar u iada ia ki mrad khloo neibhah kamwa man katni boon ki mrad wa em cha ka ki khloo iong i kam u Slow Loris uwa tip cha i kam u Lor, Hoolock Gibbon uwa khut i kam u Hulu, Clouded Leopard u jait Khla Sim, Hill Mynah uwa tip i kam u Moina wa u Pangolin u wa khut pyrtuit i u Rbai toh kiwa da jan wiar jait neidaw wa joor beh dooh ki bru ia ki wei wa em leh kiwa ngeit beit wa ki doh ki snam iong ki man dawai ki.

Da ong ko wa ka aiñ Wildlife Protection Act 1972 da khang ko u pyniap kamjooh leh u dai wa u thied ia i doh ki mrad khloo.

U ma P.S. Nongbri IFS, CF (T&WL) da pynkymo u ia waroh wa emlang ia i ma wa boon ia kaam wa leh u bru deiwa khana wa ha kawi ka chnong da sdang ki bru u pyniap ia ki khroh wa em cha hali lyngkha iong ki hadein wa tip ki wa em iaw u dai ia ki kjat khroh (Frog Legs) cha ki restaurant wapher wapher. Ini da wanrah i ia ka khlam ha ini i chong heiwa da hiar thma ki puitsaru da ki lak tylli hadein kattu kattni por wei da bam ki leh ia waroh ki kba wa ki jhoor wa rep ki bru iong kani ka chnong. Neibhah deiwa wiar jait ki khroh na kani ka chong ym em de wa bam ia kini ki puitsaru wei da sdang ki u kha roi.

U ma Y. S. Shullai IFS, APCCF da ong u wa u bru toh uwa wan khatdooh ha kani ka prythai han la katte Oo da ye u pynwiar jait ia ki mrad wa boon jait na ka sla pyrthai dooh na i rukom im u dei wa ymkut de i kwah thymme u nadooh ki sula ki thad wa ki bam wapher wapher kiwa ka pyrthai katni da tlot ko u pyndap ia Oo. Ong wa ia kini ki patein wa daw wan ymioh lad de ki u yo tang ia u hati u khla wa dang im lada lai i chakhmat ia i rukom im i katni.

Na ka liang ki waheh chnong da e i klam da u ma R. Sana na Tuber uwa khynna chaphang ka ‘Community Reserve’ lane i Khloo Iong Chnong kawa da peit da iada da ka Raij Tuber. Ong wa kmen u khana wa ka khloo iong ki nadooh wa da sdang ka chnong u chimkhia u peit ia ka deiwi da sdang biang ki sim ki doh u roi biang hapoh iong ka.

Chwa u man kani ka ialang ha Jowai da dep pynman leh ia ka ha Borghat, Saipung, Ummulong, Umkiang wa ha Khliehriat.

Previous
Next

0 Comments

Leave a Reply