Ka Lehniam Thohlangdoh ha Raij Jwai

Jowai: Ka Thoh Langdoh toh kawi na ki lehniam næ kñia e ngooh yong ka Raij Jwai kawa da leh da pyndep ha Khloo Langdoh ha i thaw wa em u Moo Langdoh kamtæ ha kani ka ka sngi Hat 27 tarik u Wisu hapyrdi i emlang u Dolloi, Pator, Langdoh, Ki Sangot, Ki Wasan, ki Phra Kur-Phra Kmai u Sangot Paswet waheh Valentideo Paswet da chim u wow pyndep ya ka lehniam.

Chwa wow poi kani ka sngi ha ka Musiang 23 tarik da em ka ‘Kbai Mooknor’ ha khmat ka yaaw ka syiem neitæ won hei step yong ka sngi Thymblieñ 26 tarik ki Chakri niam ka Raij nadooh u Dolloi, Pator, Langdoh, Sangot, ki Wasan deilang wa ki Kñi na ki Phrakur-Phrakmai pyndep ki ya ka lehniam ‘Dih Soopen’ ha Yung Langdoh.

Kani ka sngi Thoh Langdoh, katkam i sikai niam ha ki khon ka Ñiamtre da tip leh ya ka heiwi i kyntien kam ka sngi ‘Sang Sngi’, ka sngi heiwa ka Bei Rymaw-Rymchit yoh ko yei man khroo man kyntang heiwa ki paidbah wa chong chnong kiwa dang skem i ngait ha ka niam wa yah wa tyoor ki warim yait ki nei pyntakha tadaiñ wei pyntngit pynjngut yei doh i pran ka Bei Rym-aw wei ka bynta wa khaddooh yong kani ka sngi Thoh Langdoh toh i thung ki wasan yow symbe toh, symbe saru ha kpær wa em ha Yung Langdoh iwa tip heiwi i kyntien kam ‘Ka Thung Sang’.

Hawa tip ya kani ka wyrta- ka khubor man i sñiawsarong ya ka Raij ka chnong waroh kawi, heiwa ha kam kani ka sngi ‘Sang Sngi’ ka Bei Rymaw-Rymchit hapoh ka Raij Jwai yoh ko yeitæ i man khroo man kyntang, iwa deiwi i kyntien u ong kani pynyoo ko ka dak wa ki warim waheh man ki ki bru wa em i chynna jngai wei tip ki u burom, u kheiñkor yei kyrkhu yong ka Bei Rymaw ha waroh wachat, ha lyndet kani ka rukom sikai niam, ha kani ka juk wa katni won toh sakhiat ma-ai wa ki bru wa chong chnong næ ki khon ka Niamtre hapoh ka Raij Jwai man ki kiwa tip wa bna chaphang kani ka sngi wei bood ryntih ki ya kani ka adong niam?