Shillong: U Montri Rangbah ka jylla, u Dr. Mukul Sangma da ong u wa ka luti rel ymtoh ka wow kut du ha Nongbah Shillong, daw pynpoi ya ka chadooh Sohra yow pynku ya ki kaam uiñke sawari hapoh ka jylla. Yeini da ong ha ka yalang wa ki heh ka Company Northeast Frontier Railway, kawa pynkreh ya ka luti rel ha Ri-Bhoi.
Heijooh ipor, u Montri Rangbah da ong wa i rukom pait bniah yei psiah i mih ki baarjylla daw pynkrehkaam leh hei yatoh waka rel kamwa leh ya ki kari wa lai na sarok.
Da ong u leh hei yatoh wa ini ka sorkar jylla da wanrah ko chiboon ki aiñ deiwa chna ya ki District Task Force deiwa booh ya ki sahep hadooh ki Block, kam ki Labour Inspector ki wow pait ya ki bru wa wan kreh mylla na baarjylla.
Katkam i ong u Montri Rangbah, ka sorkar daw sdang ko u chna ya ki wow pait yei psiah i mih ki baarjylla ha Mendipathar, North Garo Hills, kawa da em ka luti rel wei daw leh kamjooh cha ki thaw wa daw sangeh ka rel ha ka jylla.
U Dr. Mukul da khut u ya kani ka yalang yow bichaar yei lai i kaam chna luti rel khamtam hadien wa mih i pyrchah naka KSU.
Hajrong i yakhih pyrchah ki seiñbhalang ya ka luti rel, u Dr. Mukul da ong u wa ini i pyrchah daw pynthut ko ya ki kaam wa bha waka sorkar kwah ko u leh neibynta ka jylla.
“I por dang em i ya waroh wow ran dien yow bichaar bniah wei wow pynbait ya iwa bakla deiwa chimbynta ha ki kaam wa bha wa ka sorkar wa kwah ko u leh neibynta i bha i miat yong ki paidbah “, ong u Dr. Mukul.
Da e nongmuna u wa wa i wan ka rel ha Mendipathar deiwa ong wa ki paidbah ka thaiñ hun ki wei ini leh daw pynwiar ko yei sñiaw artatien kiwa dang pyrchah.
Da pyntip u leh wa ka luti rel wow pynyabi ya ka Shillong da pdiang ka sorkar pyrdi ha u snem 2010-2011 hadien wa booddien ka sorkar jylla. Da ong u leh wa ki paidbah toh u sñiawthooh ki wa i wan ka luti rel daw wanrah ko yei myntoi ya ki paidbah khamtam ki warep.
Discussion about this post