Ka Chief Minister ka West Bengal, ka Mamata Banerjee ynne ka sngi da mihkhmat ko ha Supreme Court wow yasaaid hajrong ka mukotduma ko deiwa man leh kawa nyngkong katwa dang man Chief Minister ha ka ri wow yasaaid ha kani ka Court.
Ka Mamata kawa man ka muktiar da ujor mukotduma ko hajrong ka Special Intensive Revision (SIR) yong ki Electoral Roll wa leh da ka Election Commission of India (ECI) katni ha West Bengal.
Ka Mamata da poi ko ha Courtroom No. 1, chirup wa kiwi ki muktiar ko wei da chong bichaar ya ka mukotduma da u Chief Justice of India, u Justice Surya Kant, u Justice Joymalya Bagchi wa u Justice Vipul Pancholi.
Hanla ym em sap ko ya ki sula muktiar tangwa da sap ko da ka sari wa ka speiñkhlieh rong yong wa kylleiñ ha rdang ko.
Ka Mamata da pyndep puræ Law ko na Jogesh Chandra Choudhury College of Law, Calcutta wei jooh man ko kam ka muktiar hadooh u 2003, chwa wow psiah cha ki kaam Politics.
Ha ka mukotduma, ka Mamata da paan ko wow pyndam ya ki kattu katni ki hukum ka ECI hajrong ka SIR deiwa kyrpaad ya ka Court wow chah u pynman ya ka Election 2026 ha West Bengal Assembly deiwa pynemkaam ya ki Electoral Roll wa katni bar u pynthymme ka.
Da kyrpaad ko leh wa i bakla pyrtuid wa kajiak, i rukom thoh dak wa kiwi ha ki Electoral Roll ymtoh u chah kyntait ki ha ka Election.
Chooh chooh da kyrpaad ko wow phah ya ka ECI wow pdiang ya waroh ki kot ki sla namo ki Identification Document wa da e da ki bor sorkar kam ka sabut wow ye u thap Vote.
Heijooh i por da paan ko wow man iwa khooid hei rukom pyndam pyrtuid, wei ki pyrtuid wa chah kyntait hapoh ka Form-7 u booh ya ki Online, kamjooh leh wow sangeh yei pyndam boon tylli ki pyrtuid kiwa ye u ktah yei mantre ki bru wa em hok.
Discussion about this post