Ka Montri ka chnat i chait i khiah, ka Dr. M. Ampareen Lyngdoh hawa e yei jubab hapoh ka yung dorbar ynne ka sngi da pyntip ko wa ka Meghalaya emkaam ko 375 ngut ki Doctor Specialist tangwa da em ko kattæ kamwa 225 ngut kiwa kreh katni.
Da pyntip ko wa ini wa dep yei thung kreh wa da leh lyngba ka Meghalaya Medical Recruitment Board da thung kreh 397 ngut ki Doctor wei na kini da em 83 ngut ki Specialist wei hot hadien ini dang duna 150 ngut ki Doctor Specialist hapoh ka jylla iwa man iwa sñiawkhia i kaam.
Hawa kylli won u MLA ka UDP na Nongpoh, u Mayralborn Syiem heiyatoh wa i lai i kaam chakhmat neibynta ka Shillong Medical College, ka Montri da pyntip ko wa ym tip ko chaphang ini wei emkaam por ko thooh yutip chwa tangwa da ong ko wa ka sorkar daw chna ko boon ki PHC wa ki Sub Centre kamwa da booh bhah ha ka mang tangka.
U Mayralborn da kylli u leh chaphang i pynku kyrdan ya ka Umshaken Sub-Centre cha ka PHC, heiwa ka Montri da jubab ko wa ym tip ko chaphang ini neibhah da em palat 118 tylli ki tyrwa wa da pyrkhat ka sorkar yow pynku kyrdan wei ym kynmoo ko yei em i pyrtuid ka Umshaken.
