Ka seiñ Jaiñtia National Council hadien wa da yoh sñiaw ko yei klam yong u Montri Rangbah ka jylla, u Conrad Sangma hajrong i yakhih ka seiñ ACHIK wow dawa Winter Capital ha Tura heiwa da jubab u yeini wa ka laad wa jan dooh toh ka Mini Secretariat wei yeini ka sorkar da pynkhreh ko deiwa rap heh wei rap bha neibynta wow pynsuk ya ki nong Garo.
Neiliang ka JNC da pynkynmoo ko ya ka sorkar wa ha u snem wa da dep ha u Kmaichonglad (Dec) 2022, ka sorkar da dep ko wow wai ya u mooyurim wow chna noh ya ka Mini Secretariat ha Jowai tangwa hadooh katni ym pu em yoo ya ki dak ki chin wa mih ki. “I pynbiej paidbah donhi mo ini?” da kylli ka seiñ deiwa pynrap namo ini toh neidaw wa da jan ka Election ha itu i por.
Ka seiñ da ong ko wa Ri Jaiñtia toh kawa pynmih pynyoh booh tam ka dan ya ka sorkar tangwa iwa sñiawsih dang man ko kawa sahdien tam, iwa mut wa ka sorkar tip ko du wow chim tangwa u e won ym tip ko.
Da pynkynmoo leh ya ka sorkar iyi wa da lel heiyatoh waka Iawmusiang Market Complex kawa man kawi na ki phang dawa wa da neh slem bha, i mang poisa tangka da lai i na i por cha i por tangwa iwa phylla toh wa hadooh katni dang sahteiñ i kaam. Ka seiñ da kylli ko lada ka Jaiñtia Hills ym em hok ko mo wow yoh yei roi i paar?
Kamtæ ka seiñ da dawa ko wa da toh u pyndep noh chisyndon ya ki kular, u pyndep noh smat ya ka Iawmusiang, u sdang noh u chna ya ka Mini Secretariat kamwa da khlai kular heipor wa booh mooyurim ym du wow pynbiej Election yaki paidbah næ lehke yaka poisa kawa toh hok yong u paidbah.
Khaddooh ka seiñ da phah ko leh ya ka kyrwoh kawa che cha ka sorkar wa ymtoh u leh chilliang hawa chna ya ka Mini Secretariat, kamwa da mut da thmu wow chna ha Tura, ha Jowai leh thij toh u e.
Puræ leh: Ha i lut wa T. 19.8 klur u chna ya ka Mini Secretariat ha Jowai
Discussion about this post