theme-sticky-logo-alt
theme-logo-alt
Advertisement ad1
Advertisement ad1

Ka MSPCB tip ko yei em ki karkhana pyrchah aiñ, du 3-4 tylli toh kiwa da yoh bor: HM Shangpliang

Advertisement ad1
Advertisement ad1

U MLA ka Congress uwa man leh u dkhot yong ka Environment Committee ka Yung Dorbar Chna-aiñ, u Himalaya Muktan Shangpliang da ong u wa i kharoi ki karkhana Coke ha East Jaiñtia Hills District man ko iwa lyngngoh neibhah wa du ha ki kajiak por da mih ki karkhana kam ki tit.

Da ong u wa da yoh yutip wa em ki du kamwa 3-4 tylli ki karkhana kiwa da yoh bor næ ka Consent to Establish/Consent to Operate na ka Meghalaya State Pollution Control Board, tangwa kiwi toh kiwa kiwa da chah kheiñ pyrchah aiñ neibhah wym em ki ya ki CTE/CTO næ yohbor ki na ka sorkar.

Advertisement ad1

Da ong u wa da yoo da ki khmat ya i tdem wa yong wa ku cha suiñ deilang wa i sma wa mih na ki karkhana, wei pynsñiaw u wa ka sorkar toh u leh ko iyi iyi deiwa smat hajrong ini, wei toh u khang smat ya waroh ki karkhana kiwa krehkaam pyrchah ya ka aiñ.

Da pyntip u leh wa ki paidbah wa chong chnong da ood ki cha oo wa ki karkhana krehkaam ki nadooh 9:00 waje i miet hadooh 5 waje i step, wei ki paidbah hap ki wow riñ mynsien ya ka la-ær kawa tngit wa pynmih da ki karkhana Coke kawa ye u wanrah yei maa ya i chait i khiah yong kiwa chong chnong.

U Shangpliang da ong u wa ka Sate wa Central Pollution Control Board ki tip ki yei mih ki karkhana Coke ha ka thaaiñ, neibhah ka MSPCB ym em e ko ya ki CTE/CTO yong kiwa boon wei ki tip ki wa hanla ym pu e bor leh, kini ki karkhana ki da krehkaam ki, wei toh i kaam yong ka MSPCB wow pynchitom ya ki karkhana kiwa krehkaam pyrchah ya ka aiñ.

Da ong u wa du ki NOC wa da e na ki Dorbar Chnong næ Dolloi ym pu biang wei ym toh ki wa e bor wow booh ya ki karkhana Coke, tangwa em leh ki aiñ ki kyndon wa ka MSPCB ka hap ko wow pynkrehkaam neibhah toh du kani ka chnat kawa ye wow e bor.

U MLA da pynsñiaw u leh wa ya ki jakhlia namo ki Bio Medical Waste na ki Hospital leh da thang ha ki karkhana Coke, wei ha i lai pait da yoh yutip wa ki jhep Hospital ki yarap wow saiñ ya u mooyong ha kitai ki karkhana, kamtæ da kylli u ya ka chnat i chait i khiah wa u Deputy Commissioner lada tip ki ya ini, wei lada tip ki, ileh suki hi-eh ki.

U Shangpliang da ong u wa ka sorkar toh u phah ko dei takit bha ya i kharoi ki karkhana Coke ha ka Elaka Sutnga, wei toh u phah takit leh neiwon kitai ki karkhana yoh mooyong ki wow thang.

Share this:
Previous

Waroh ki skur ha palatsor leh man ki kiwa biang, ym miat wow yaknieh du ha kawi ka skur: Lahkmen Rymbui

Next

Palat 80 ngut wa wan chim tika yada COVID-19 hadien i pynsñiawthooh ha chnong Bataw