Jowai: Kam chibynta wow kynmoo warom ya ka sngikha u Sardar Vallabhbhai Patel uwa man kam uwi na kiwa yaleh wow yoh laitlooid ka ri India, neiliang ka BJP West Jaiñtia Hills da pynman ki da ka lai kjat kawa sdang nadooh na madan Daimasi, Ladthadlaboh wei da pynkut ha khmat ka yungkrehkaam u DC ka West Jaiñtia Hills.
Ya kani ka sngi ha uni u snem da tip ya ka kam ka Run for Unity kawa da pynbna da u Montri Rangbahdooh ka ri u Narendra Modi wow kynmoo ya ki kaam wa khroo wa da leh u Sardar Patel kiwa wanrah ya i ya tylli hapoh ka ri.
Hei yatoh wa ini ka “Run for Unity” neiliang ka yung krehkaam u DC ka West Jaiñtia Hills hei ya krehlang wa District Sports Office da pynman ki ya ka yakop phet wa waroh ye u yachimbynta kawa sdang nadooh na Kiang Nangbah Stadium wei da phet ki na sarok NH-44 hadooh wa poi Lad Nartiang wei da pynnoh na u sarok Jowai Intermediary Bypass da mih ki ha ka Yingkieñ Myntdu wei phet ki cha Kiang Nangbah Stadium lyngba ka Gate Laban, Newhill wa Ladthadlaboh.
Ha chwa wow pynbna ya kiwa jop da em ka yalang wa tbian heiwa u EMH Passah, Working President ka WJDSA uwa da khana ya i thong kani ka Run for Unity.
Neiliang kiwa phet yong ki kynthai da jop ka Pynhun Shulet kawa pyndep heipor 38 minit 33 second, wa ar da yoh ka Happiness Phawa kawa pyndep heipor 40 minit 51 second katwa yei wa le da yoh ka Phyrnai Kyndait kawa pyndep heipor wa 41 minit thij.
Ha ki chynrang won da jop u Marso Kyndait uwa da pyndep heipor 27 minit 49 second, wa ar da yoh u Ribet Dkhar uwa pyndep heipor 28 minit 57 second katwa yei wa leh da yoh u Belin Dkhar uwa pyndep heipor chi kynta 7 minit 66 second.
Discussion about this post