Ka sngi Musiang yong ka Behdieñkhlam neibynta i bha i miat yong waroh hapoh ka Raij Jowai

Ynne ka 13 tarik ka sngi Musiang kawa man ka sngi wa le yong ka lehniam Behdieñkhlam ki khon ka Raij Jowai, da man ko kawa lai bait heiwa ki Khonraij da lai thooh ki ya ka Symbood Khnong na Loomsooyung wow pynyieñ ya ka ha Loom Khliehchnong.

Ha Yung Blai won u Dolloi da pynkhreh u ya i pyrnah wei da e kti ya i pyrnah ha u Sangot Paswet wow suit u choor ha ka Khnong Blai deiwa rah cha Mynkoi Pyrdi, Biar Ka Blai neitæ won cha Madan Pohsawiar heiwa da em i Ngooh i Dem na u Kñi ka Kur Nikhla.

Heipor chiteiñ sngi kiwa kitkaam niam da pynman ki yei yachem ha Mynkoipyrdi, Loompyrdi Iongpiah heiwa da wan chimbynta da ki khon na ki Kmairaij chirup wa ki heh yong ka Seiñ Raij heiwa da yoh i klam na u President ka Seiñraij Jowai, u H. Toi wa ki kyntien na u Dolloi ka Elaka uwa man leh u khlieh ka niam, u Puramon Kynjing.

Manda kut ka yalang da lai ki cha Iawmusiang wow rah ya ki Dieñkhlam heiwa da chaad ha waroh ki thaw niam ka Raij kam ha Biar Ka Blai, ha Datlawakor, ha Madan Chaad Sukra wa kiwi kiwi ki thaw deiwa chimbynta da ki phaw hajar ngut ki khon ka Raij Jowai.

Hadien wa da pynpoi ya ki Dieñkhlam ha Madansiatthong, ki Khonraij (Chiliangraij) da lai li thooh ki ya ka Khnong Blai na Loom Sooyung yow rah ya ka cha Madan Poh-Sawiar.

Manda poi ha Madan Poh-Sawiar u Dolloi da e u yei ngooh i dem heiwa da paan yei bha i miat yong waroh kiwa chong wa sah hapoh ka Raij wei da e kti u yei pyrnah Khnong Blai ha u Kñi ka Kur Nikhla u Borki Nikhla wow e u i ngooh i dem wa Ka Suit Ka Choor ha ka Khnong Blai deilang ya ka Bei Rymaw, ki Blai ki Syiem wei manda dep neini ki Khonraij da rah ki ya ka Khnong Blai cha Madan Moosyiem wa em haphrang ka Yungwalieh ka Chilliangraij katwa ki Kmairaij da rah ki jar jiar ki Dieñkhlam.

Ki Kmairaij da rah ki ya ki Dieñkhlam kiwa man leh ki Dieñsæh Dieñchaan nadooh na Madansiatthong, ha Biar Ka Blai hadien wa chaad neini da rah ya ki Dieñkhlam hadooh wa poi jar jiar ki chnong yong ki yow pynyieñ ya ki Dieñkhlam.

Ynne da wan sakhi da ki manbei, ki khynnah kynthai kiwa synraan yow pynphooh ya ka chaad niam heiwa da riam ki da ki sula wa miat chirup i ksiar i rupa.