Tura: U National President ka NPP u Conrad K. Sangma ynne ka sngi lai hiar yalap Election u ha Siju- Rongara Constituency kawa em leh khappood wa ka ri Bangladesh.
Kani leh man ko kam chibynta wow pynkut noh ya ka yalap Election wei da wan u neibynta u kyrtong u Rakkam Sangma wei da ong u wa ham chah pynbiej ya ki kyntien thok uwa yaleh pyrchah ya oo kiwa kular wow wanrah hadooh u Bnai tangwa daw wiar ki hadien ka Election.
Da pynkynmoo u ya ki paidbah yeiwa man sakhiat ha South Garo Hills kawa da chah iehbeiñ deiwa ong wa ka Siju toh kawa da paw naam ha ki kaam uiñke suwari tangwa ki sarok leh ym biang ki kamjooh ka Network Phone neibhah ka kaam uiñke suwari toh kawa yarap wow kyntu yei yoh i kot ki paidbah.
“Ka la-ær NPP toh kawa khlan bha wei da sñiaw ya ka ha kylleiñ kiwa da kyrchaan ya ka. Toh u kular lang i wow pynman sakhiat ya waroh wa yooluti iwa man leh i thong u Purno Sangma,” da ong u Conrad.
Ynne ka sngi da lai yalap Election u ha ki le thaw ha Siju-Rongara ha South Garo Hills wa artylli ha West Garo Hills ha Miliem kawa haap hapoh ka Gambegre Constituency wa ha Eden Bari kawa haap hapoh ka North Tura Constituency. Wa u Conrad da emlang leh ka bei u ka Soradini K. Sangma ha ki ar thaw ha West Garo Hills.
“Ym em iyi iyi leh i bahkhleih namo i pynsakhiat wa krehkaam hok ki Scheme kani ka sorkar Congress. Kani ka sorkar ym em ye ko wow wanrah ya i roi i paar iwa man solansar wei i wanrah u Dr. Mukul toh iwa leh chilliang wei kiwa boon ym ye de ki wow poi cha ka kyrdan wa waroh ka ri,” da ong u Conrad ha ka yalap Election ha Milliem heipor wa paan kyrchaan u ya u kyrtong u Phillipole D. Marak.
Ha Eden Bari won u Conrad da yaroh u ya u kyrtong ka North Tura u Thomas Sangma kam u bru wa biang bha wei da jooh man u leh kam u MP ka Rajya Sabha wei daw yarap u wow pynpoi ya ka roi ka paar cha waroh ki chnong kani ka Constituency.
Mynstep won u Deputy Chief Minister ka Manipur Yumnam Joykumar Singh daw wan u wow yalap Election neibynta ka NPP chirup wa u Conrad K. Sangma.
Discussion about this post