Ynne ka sngi da pynman ya ka lehwarom Meghalaya Day wa 49 ha Shillong ya kawa da pynman da ka Directorate of Information and Public Relations heiwa u montri rangbah ka jylla da man u kam u kongsan, katwa u James P.K. Sangma, montri ka Information & Public Relations da man u kam u symbood kongsan hei emlang leh ki montri, u Lahkmen Rymbui, A.L. Hek wa kiwi kiwi.
U Conrad hawa e yei klam da ong u wa i lehkmen ya kani ka sngi man i iwa kongsan tam neibhah daw ye u kynmoo ya kiwa yahkhmat warim wow yoh ya ka jylla.
Da ong u wa ka sorkar yaleh bha ko wow wanrah ya ki kaam pynroi wei wow pynkylla ya ka jylla kam ka Model State.
“Ka thong yong i toh wa ka Meghalaya u em ko ha ka Top 10 Indian States ha ki 10 snem wow wan heiyatoh wa i yoh i la (Per Capita Income) wa i pynrpoi liang wanang,” da ong u Conrad.
Da ong u leh wa ka sorkar u pynlut ko T. 1,200 klur wow pynmiat ya ki sarok ha ka jylla, wei heiyatoh wow pynkylla ya ki thaw sumaar daw pynku kyrdan ya ki 659 tylli ki thaw sumaar.
Heiyatoh wa ki kaam rep, da ong u wa da sdang ya ka Piggery Mission wow pyndap yei emkaam sniang hapoh jylla wa kiwi kiwi.
Ha kani ka sngi da pynkup burom leh ya kiwa yoh ya ka Meghalaya Day Excellence Award 2020.
