Jowai: U Union Home Minister, u Amit Shah ynne ka sngi da wan embynta lang u haka sngi wai yaka 68th Plenary ka North Eastern Council wa pynman ha Guwahati. U Shah da sdang u deiwa kynmoo warom ya uwa yoh yaka Bharat Ratna u Bhupen Hazarika. Deiwa ong wa da yohlaad u Hazarika wow lai sah chadooh cha baar ri wa heiwon heiwon i bynta ka ri, tangwa ym em ieh u ka ka thaaiñ mihsngi
Da ong u leh ka thaaiñ Northeast man ko kam ka ‘Mini India’ kawa em ya ki loom Himalaya ha iwi i liang wa ki loom ki wah wa miat hapoh pyrthai kam ka Barak, Brahmaputra wa Imphal Valley. Da pteiñ u deiwa ong wa ka Northeast em ko kamwa 9% i thaw na waroh kawi ka ri India wa i boon bru wa 5 klur iwa man 3.78% na waroh kawi ka ri. Da em leh kamwa 270 ki jait bru kiwa klam hadooh 150 tylli ki jar jiar ki jait ktien wei ka sorkar ka yaleh ko wow yada ya ini dustur riti kani ka thaaiñ.
Heiyatoh waka North East Council da ong u wa da booh kyrpang ya 30% ka mang poisa neibynta ki thaw wa dooh wa duk yow pynku ya ki.
Heiyatoh won waka pynbait pood waka ri Bangladesh lyngba ka Bangladesh Land Boundary Agreement, da ong u wa kani ka rai toh ka wow pynim biang ya ka luti duriaw hapyrdi ka Kolkata wa Dhaka. Wei heipor chwa wow yoh laitlooid kani da man ko ka luti khayi pateiñ yaka thaaiñ Northeast. Da pyntip u leh wa ka sorkar wa katni thmu ko wow pynpoi yaka luti rel ha waroh 8 tylli ki jylla ha u snem 2022.
Heiyatoh won wa i pyndam yaka Article 370 ha Jammu and Kashmir, da ong u wa em i sñiawthooh bakla wa daw pynkylla yaka Article 371. Da kular u wa ka sorkar ym tba ko ya ini iwa pynman kyrpang yaka thaaiñ Northeast.
Hawa klam won chaphang i pyndep pynmih pyrtuid yaka NRC ha Assam, u Shah da pynsñiaw yei sñiawhun wei wa da ye u pyndep yaka katkam i por wa da booh wei ka sorkar leh ym e laad ko ya kiwon kiwon ki baar ri wow neh ki hapoh ka ri.
Neiliang u Union Minister of State (Independent Charge) for the Ministry of Development of North Eastern Region and Minister of State for Prime Minister’s Office, Ministry of Personnel, Public Grievances & Pensions, Department of Atomic Energy and Department of Space, U Dr. Jitendra Singh da ong u wa ha kini ki 5 snem wa da dep, da ap ka sorkar yei sur ki paidbah heiwa da pynku leh yaka muna poisa ka North East Council cha T. 1476 klur neibynta u snem 2019-20.
Da ong u leh wa neibynta kiwa lai puræ ka thaaiñ Northeast da chna ya ki ya ki Hostel ha kiwa boon ki bynta ka ri, kam ka Northeast Hostel ya ki kynthai ha Bangalore University. Kamjooh yaka Northeast Hostel kawa dang chna katni ha Jawaharlal Nehru University (JNU), wei daw chna leh yaka jooh ha Delhi University.
Ha kani ka NEC Plenary Meeting da chimbynta da ki Governor, Chief Minister, MP ka Northeast wa ki shahep wa heh kyrdan ka Northeast.
Discussion about this post