15 49.0138 8.38624 1 0 4000 1 https://wyrta.com 300 0
Advertisement ad1
Advertisement ad1

Ksoh ka KSU ya kawi ka manyung wa chah kyntait naka NRC ha SWKHD

0 Comments
Advertisement ad1

Jowai: Ki dkhot yong ka KSU hadien wa da pynman ki ya i paitsiar ya i lai i wan ki baar jylla khamtam hadien wa mih ka Final List yong ka NRC ha Assam, ynnin ka sngi da yoh ksoh ki yaka manyung u Azimuddin Choudhury. Ya uni u bru da yoh wow kem nyngkong da ki dkhot yong ka KSU Balat – Dangar Area Unit ha yaw Balat hadien wa da wa suba yei rukom yieñ wa i rukom wan leh doctor kabiraij u ha yaw Balat.

Hawa takit ya oo da pyntip u wa da poi wansah ha kani ka thaw da i yarap yong u Mulor/Headman yong ka chnong Jamadwar. Rap hadien ki dkhot yong ka KSU Ranikor Circle da lai ki wow hiar yow takit ya uni u bru wa ya ka yung ka sem, kiwa da pyntip wa i wan yong ki cha kani ka thaw toh hadien wa ki da chah kyntait ki naka Final List yong ka NRC ha Assam wei i thmu yong ki ym em mut wow wan chong chnong thymme noh ha kani ka thaw lyngba i yarap yong u Mulor ka Jamadwar. Ka seiñ rap hadien da pyntip noh ko cha ki pulit yong ka South West Khasi Hills District heiwa ki pulit ka Gumaghat da wan rah ki ya kani ka manyung ynnin ka 7 tarik.

Ka seiñ da kyntu ko yaki bor District wow chimkhia hajrong kani ka kaam yei wan psiah ki baar jylla haka thaaiñ iwa da pynbor yaka seiñ wow leh hi yaka kamram. Da pynrap deiwa ong wa burom ki ya i bor yong ka aiñ tangwa lada ym chimkhia wa pura hajrong kani ka kaam ym toh u pynbaad yaka seiñ heiyatoh wa kani ka phang.

Kamtæ ka seiñ da kyntu ko yaka District Task Force waka District Level Team wa toh ki u pyndep hok yaka kaam wei ym toh u sah du ha i pyrtuid donhi.

Ka seiñ da kyntu ko leh ya waroh ki Hima, ki Syiem wa kiwa yahkhmat chnong wa ym toh u lehke yaka mynried yong ka jaitbru. Da paan leh ya i krehlang yong waroh kiwa chnong chnong ka thaaiñ khappood.

Ini toh katkam wa pyntip u Forwardman Nongrem, President KSU South West Khasi Hills District

Advertisement ad1

0 Comments

Leave a Reply