Shillong: U Montri Rangbah wa thymme ka jylla, u Conrad K Sangma hadien wa chimti u kam uwa yahkhmat ka sorkar Meghalaya Democratic Alliance (MDA) da e khublei u ya waroh ki seiñ saiñ pyrthai ka jylla kiwa da wanrah ya ka sorkar synrop hapoh i yahkhmat ka NPP.
Hawa yaklam wa kiwa pathai khubor ynne ka sngi u Conrad da pynsñiaw u wa ym man i iwa suk wow yahkhmat ya ka sorkar synrop kawa em 5 tylli ki party hanlada em chiboon i eh i khoo tangwa kanti ka sorkar synrop ye ko u lai bait dei yatylli ki party waroh chirup.
Da pyntip u leh wa da yachem wa ki sahep ka sorkar jylla wei da yoh yutip u wa ka sorkar jylla em ko hapyrdi i dooh poisa wa khroo wei man ko leh iwa khroo bha wa yachem ka sorkar.
U Conrad da ong u wa ka sorkar wa da dep ymem ye ko wow e i synchaar wa pura wei ka sorkar yong oo ym pait chiliang næ nohliang ko du ha kawi donhi ka thaw tangwa u kreh ko neibynta ka jylla waroh kawi.
Da ong u leh wa ka sorkar jylla daw thooh ko ki laad wow pyllait ya i khayi mooyong wei wow pynmiat pynbha ya i rukom pynlai pynwan ya ka poisa.
Heijooh i por da ong u wa i ya pynbaad iwi ya iwi heipor Election da kut i wei da toh i por wow yakrehlang wow wanrah yei roi i paar hapoh ka jylla.
Choh chooh da pynrap u wa kani ka sorkar daw kreh kyrpang ko neibynta i puræ puthi, i yoh khih yoh kreh, ki sarok cha nongkyndong, wa kiwi kiwi hapoh i yahkhmat yong oo.
Hei yatoh wa i mih i pynbaad wa kani ka sorkar ymtoh ka yong ka NPP tangwa ka yong ka BJP, neiliang u Conrad da ong u wa ini ymtoh iwa sakhiat wei kani ka sorkar toh kawa yahkhmat da ka NPP ymtoh da ka BJP.
Da pynrap u leh deiwa ong wa kani ka sorkar ymtoh yong kawon kawon ka party kawa heh namo khian tangwa man ko ka sorkar yong waroh khlem kheiñ chiliang.
Discussion about this post