Ka seiñ Congress da pynsñiaw ko yei sñiawkhia wa joor hajrong i joor i sahkut kari iwa da ktah hadooh kattæ kattæ yei lai i wan ki paidbah kamjooh leh yei ku dor ki marbaam mardih kamjooh leh i Petrol wa Diesel.
Ya ini neiliang ka seiñ da pynsñiaw ko ha ka yalang yong ka Shillong City Congress Committee kawa da pynman ynne ka sngi ha Congress Bhavan, kawa da khut pynman da u Process T Sawkmie, hadien wa da chikmti u kam u President wa thymme yong ka Shillong City.
Ha kani ka sngi, u Process da lumlang u ya ki Block Committee yong ka seiñ kiwa haap ha ki 7 tylli ki Constituency hapoh ka Shillong City neibynta wow yaklam wei wow yatai kammon wow nang pynkhlan ya ka seiñ wei wow pynkhreh ya ka Election MLA kawa daw man ha u 2023 khamtam hadien wa mih noh yong ki 12 ngut ki MLA na kani ka seiñ wow psiah cha ka seiñ TMC.
Hawa klam cha ki laad pathai khubor hadien wa wai ka yalang, u Process da ong u wa ka seiñ da chim rai kow wow pynkhlan ya ka seiñ ha Shillong City wei wow kyruiñ cha kitu ki thaw wa kam ka seiñ tlot bha ko wei da rai wow thung leh da ki Adhoc President, heiwa da thung ya u Fantin J Lakadong, MDC kam u Adhoc President ka South Shillong Constituency, katwa ha North Shillong Constituency daw pait da u PN Syiem, MDC.
Heiyatoh wa i sahkut kari, ka seiñ da kyrpaad ko leh ya u SP Traffic ka EKH wa toh u pynbait syndon noh yei rukom pynlai kari ha ka Shillong, neibhah da lut i por kiwa lai wa wan da ki kynta heithaw wow poi du hapoh kattu katni por.
Ha iwi won i liang, da ong u wa ha u snem wa da lai ym em da yohlaad wow lehkmen ya ka Christmas kamwa da jooh leh ha ki por kiwa da lai neibhah wa ktah ka khlam COVID-19 tangwa kamwa da yoo won ha uni u snem 2021 kiwa boon ki leh niam toh ki yong ki paaid Hindu næ Muslim toh kiwa da lai bait wei najrong ini da sakhi leh wa ka sorkar da pynman ko ya ka tamasa ‘Cherry Blossom’ heiwa da ki phaw hajar ngut ki paidbah da tooid ki cha kani ka tamasa.
Da ong u wa man iwa emkaam wow pynman ya ki tamasa neibynta i ku yong ka jylla wei toh leh wow e laad yei lehkmen Christmas kamwa da jooh lehkmen ha ki snem kiwa da lai wow chah u pynman yei lai Christmas Carol.
Chooh chooh da pyntip u wa da yaklam leh yei ku dor ki mar ki mata iwa da ktah ya kiwa dooh wa duk, neibhah wa ka bai mylla bai kreh ym ku, iwa da wanrah yei wym lai bait i dai i thied, kamtæ da kyrpaad ya ka Deputy Commissioner yong ka East Khasi Hills wow lai pait yeini.
